ԱՄՆ-ն պատրաստ է կատարելագործել Ռուսաստանի հետ իր հարաբերությունները, բայց մտադիր չէ փոխզիջման գնալ ՆԱՏՕ-ին ու ԵՄ-ին իր աջակցության հարցում։ Այս մասին հայտնել է ՄԱԿ-ում ԱՄՆ մշտական ներկայացուցիչ Նիքի Հեյլին, ելույթ ունենալով ԱԽ նիստին, փոխանցում է AFP–ն։
«ԱՄՆ-ն հնարավոր է համարում Ռուսաստանի հետ հարաբերությունների բարելավումը, ի վերջո մենք նույն սպառնալիքներին ենք բախվում։ Բայց Ռուսաստանի հետ համագործակցություն չի կարող լինել մեր եվրոպացի բարեկամների ու գործընկերների անվտանգության հաշվին»,- ասել է նա։ Նրա խոսքով ԱՄՆ-ն հանձնառու է այն կառույցներին, որոնք ապահովում են Եվրոպայի անվտանգությունը ու ՆԱՏՕ-ին նրա աջակցությունը նույնպես անսասան է։
Դիվանագետը նաեւ շեշտել է,որ ԱՄՆ-ն ու ԵՄ-ն համակարծիք են այն հարցում, որ Ռուսաստանի դեմ պատժամիջոցները պետք է պահպանվեն քանի դեռ Ռուսաստանը Ղրիմը չի վերադարձրել Ուկրաինային։
