Ես ոչ մի բանից, ոչ մի երեւույթից չեմ վախենում եւ գտնում եմ, որ դա շահարկումներ է: Այս մասին «Ազատություն» ռադիոկայանին տված հարցազրույցում նշել է Հայաստանի պաշտպանության նախկին նախարար, «Օհանյան-Րաֆֆի-Օսկանյան» դաշինքի ցուցակը գլխավորող Սեյրան Օհանյանը՝ անդրադառնալով մամուլի հրապարակումներին, ըստ որոնց իր դեմ կարող է քրեական գործեր հարուցվեն՝ բանակում չարաշահումների հետ կապված, ընդհուպ անգամ գրեցին, որ կարող է զինված խմբի բացահայտման շրջանակներում իր անունը կապվի:
«Ես, ընդհանուր առմամբ, ոչ մի մտավախություն չունեմ ոչ մի բանից, որովհետեւ գտնում եմ, որ ես իմ ծառայությունը իմ երկրին, իմ հայրենիքին տարել եմ արդար, եթե ինչ-որ խնդիրներ լիներ, ապա այդ խնդիրները ժամանակին կբարձրաձայնեին: Ես ոչ մի բանից, ոչ մի երեւույթից եւ այլն, չեմ վախենում եւ գտնում եմ, որ դա շահարկումներ է: Ընդհանուր առմամբ այսօր լրատվական դաշտը լցված է տարբեր մեկնաբանություններով, եւ հիմնական թիրախը ես եմ հանդիսանում: Գտնում եմ, որ դա նաեւ բարոյականությունից մի քիչ զուրկ երեւույթներ են, ճիշտ չեն»,-ասել է Սեյրան Օհանյանը:
Նա նշել է, որ չգիտի, թե ինչ են փնտրում իշխանությունները. «Համենայն դեպս՝ նույն այն աշխատատեղում, որտեղ որ ես երկար տարիներ իմ ծառայությունը տարել եմ, փնտրողներից մեկը ես եմ եղել եւ ամենաշատ փնտրողը ես եմ եղել եւ ամենաշատը ես եմ բացահայտել: Գոյություն ունի քաղաքացիական վերահսկողություն Զինված ուժերի նկատմամբ հասկացությունը, որի մի մասը իրականացրել է պաշտպանության նախարարի ենթակա վերահսկողական ծառայությունները՝ վերահսկիչ վարչությունը, Ռազմական ոստիկանությունը, ներքին աուդիտի վարչությունը, եւ հիմնականում իմ գործունեության մի մասը ես նվիրել եմ հենց կոռուպցիոն ռիսկերի դեմ պայքարին»:
Օհանյանն ընդգծել է, որ իրենց սկսած գործը ավարտին կհասցնեն: