2017 թվականին Հայաստանը 3.2%-անոց ՀՆԱ-ի աճ է ակնկալում, իսկ 2018 թվականից կարելի է առնվազն 4-5%-ի աճ ակնկալել: Այս մասին ՀՀ կառավարության փետրվարի 23-ի նիստից հետո լրագրողների հետ զրույցում հայտարարեց ֆինանսների նախարար Վարդան Արամյանը:
Նրա խոսքով՝ հունվարին 6.5%-անոց տնտեսական ակտիվության ցուցանիշ է արձանագրվել: Այդ պատճառով ծրագրային ցուցանիշները, հնարավոր է, նույնիսկ գերակատարվեն, եթե տնտեսությունն ուժեղ ցնցումների չենթարկվի:
Արամյանն ընդգծեց, որ վերջին տարիներին Հայաստանը չէր կարող նույնքան տնտեսական աճ արձանագրել, ինչպես 2002-2008 թվականներին: Այդ պատճառով 2014-16-ին պետությունը դրամական եւ հարկաբյուջետային խթանման քաղաքականություն է վարել: 2016 թվականին 80 մլրդ դրամով (շուրջ 164 մլն դոլար) պակաս հարկ են հավաքել, իսկ ծախսերը գերակատարել են 40 մլրդ դրամով:
«Հարկահավաքման մասով պակասորդի պատճառը 300 մլրդ դրամի չափով անվանական ՀՆԱ-ի կրճատումն է, այդ թվում՝ ցածր գնաճի պատճառով: Եթե հաշվի առնենք, որ ՀՆԱ-ում հարկերի մասնաբաժինը 20.6% է, ապա հարկային բազան կրճատվել է 50-60 մլրդ դրամով: Բայց հիմա մենք ավելի բարձր աճի տեմպերի ենք հավակնելու, եւ դա արձանագրելու ենք մեր ծախսերի կարճաժամկետ ծրագրում: Բայց ես չեմ ուզում հապճեպ շռայլ խոստումներ տալ. ուզում եմ խոսել այն մասին, թե ինչ ենք պատրաստվում անել»,- նշեց Վարդան Արամյանը: