Ես եղել եւ մնում եմ Սուրիկ Խաչատրյանի թիմակիցը: Այդ մասին, այսօր՝ փետրվարի 24-ին, ԱԺ-ում լրագրողների հետ զրույցում նշել է ՀՀԿ խմբակցության պատգամավոր Հայկ Գրիգորյանը, ով ծնունդով Գորիսից է, նախկին մարզպետ Սուրիկ Խաչատրյանի մտերիմը:
Նրա խոսքով, ինքը Սուրիկ Խաչատրյանի հետ բարեկամ է, բայց ոչ ազգակցական կապի իմաստով. «Ժողովրդի լեզվով ասած՝ չակերտավոր բարեկամ, էդ իմաստով», - բացատրեց պատգամավորը:
Հարցին, թե մտադրություն ունի՞ անցնել ընդդիմադիր դաշտ՝ հաշվի առնելով, որ ինքն ու Սուրիկ Խաչատրյանը դուրս են մնացել ընտրական գործընթացներից, չկան ՀՀԿ-ի ցուցակում, Հայկ Գրիգորյանն արձագանքեց. «Չէ հա, ինձանից ի՞նչ ընդդիմադիր: Ես ինձ ընդդիմադիր դաշտում չեմ էլ պատկերացնում: Իհարկե, եթե Հանրապետական կուսակցությունը չանցնի ընդդիմություն»:
