Այն ինչ տեղի է ունեցել Արարատի մարզում, անընդունելի է ինձ համար: Այս մասին NEWS.am-ի հետ զրույցում ասել է ՀՀԿ խմբակցության քարտուղար Գագիկ Մելիքյանը՝ անդրադառնալով Մասիսում նախօրեին ՀՀԿ թեկնածուների միջեւ տեղի ունեցած ծեծկռտուքին:
«Ես համոզված եմ, որ սա այլ հետեւանքներ չի կարող ունենալ, իրավապահները հետաքննություն կիրականացնեն եւ կպարզեն տեղի ունեցածը, բայց որպես քաղաքական դաշտում տեղի ունեցած իրադարձություն, սա կարծում եմ քաղաքականության համար անընդունելի երեւույթ է: Ամեն ինչ կանենք, որ հետագայում բացառվեն նման երեւույթները եւ մրցակցությունը տեղի ունենա քաղաքակիրթ ձեւով»,-ասաց Մելիքյանը:
Դիտարկմանը, որ նման միջադեպերի պատճառը նաեւ այն է, որ նոր ընտրական օրենսգրքով նույն կուսակցության թեկնածուները պետք է մրցակցեն միմյանց հետ, ՀՀԿ-ական պատգամավորն արձագանքեց. «Կարծում են, որ իրականում ենթադրելի չէր նման բան: ՀՀԿ տարածքային ցուցակներում ընդգրկված թեկնածուները գրեթե բոլորը իրենց տարածքներում հեղինակություններ են եւ դա է , որ ենթադրում է, որ ակտիվ մրցակցություն պետք է լիներ: Իհարկե, Արարատի ընտրական տարածքում տեղի ունեցածը անընդունելի երեւույթ է ինձ համար: Կարծում եմ առաջիկայում կհարթվի այս ամենը»: