Հնդկաստանի Գազիաբադ քաղաքի ոստիկանությունը խաբեբայության համար ձերբակալել է Ringing Bells ընկերության հիմնադիր Մոխիտ Գոելին, որը խոստացել էր մոտ 4 դոլար արժողության սմարթֆոններ մատակարարել,հայտնում է IANS–ը։
Ringing Bells ընկերությունը ուշադրություն էր գրավել 2016-ի փետրվարին, երբ հայտարարել էր, որ ընդամենը 4 դոլար արժողության սմարթֆոններ է արտադրելու ու սկսել էր սմարթֆոնների ձեռքբերման հայտեր ընդունելով՝ ստանալով մոտ 70 մլն նախնական պատվեր։
Ընկերությունը խոստացել էր մինչեւ 2016-ի հունիս մատակարարել մոտ 2․5 մլն սմարթֆոն, բայց հուլիսին ընդամենը 5 հազար սմարթֆոնի մատակարարման մասին է զեկուցել։ Այդ ժամանակվանից ընկերությունը այլեւ ոչ մի մատակարարման մասին չի զեկուցել, ընդ որում այդ հեռախոսները, ըստ էության, թաիվանական ընկերության պատրաստի հեռախոսներն էին, որոնք արտադրված էին Freedom 251 ապրանքանիշի հետ համատեղ։ Ավելին, ընկերությունը դրանից հետո դադարել է առաջարկել Freedom 251, իրացնելով ուրիշ սմարթֆոններ ու այլ էլեկտրական տեխնիկա։