Պաշտպանության բանակը վստահորեն կատարում է իր առջեւ դրված խնդիրը: Այս մասին, այսօր՝ փետրվարի 25-ին, «Օհանյան-Րաֆֆի-Օսկանյան» դաշինքի համաժողովի ժամանակ, լրագրողների հետ զրույցում նշել է պաշտպանության նախկին նախարար, հիշյալ դաշինքը գլխավորող Սեյրան Օհանյանը՝ անդրադառնալով շփման գծում լարվածության աճին եւ ադրբեջանի զինուժի հարձակման փորձերին:
«Այս իրադարձությունների վերլուծությունը ցույց տվեց, որ մեր բանակը կայացած է, այս տարիների ընթացքում կարողացել ենք ստեղծել բանակ, որը վերահսկում է մեր անվտանգությունը: Հուսանք, որ այսուհետ մեր բանակը կկարողանա պաշտպանել եւ վստահորեն կատարել իր առջեւ դրված խնդիրները»,-ասաց նա:
Ավելի վաղ NEWS.am-ը հայտնել էր, որ փետրվարի 25-ին՝ ժամը 03:00-ի եւ 04:00-ի սահմաններում, շփման գծի միանգամից երկու` հարավարեւելյան (Մարտունի) եւ արեւելյան (Ակնա) ուղղություններով հակառակորդը, օգտագործելով ականազերծման համապատասխան տեխնիկա եւ հատուկ միջոցներ, ձեռնարկել է հարձակման փորձ: ՊԲ առաջաջապահ ստորաբաժանումները, նաեւ շնորհիվ տեսադիտարկման սարքավորումների, երկու ուղղություններում էլ ժամանակին հավաստանշել են ադրբեջանական ստորաբաժանումների առաջխաղացումը եւ կորուստներ պատճառելով հետ շպրտել ելման դիրքեր: Բանակի առաջապահ ուժերի պատասխան գործողությունների արդյունքում հակառակորդը տվել է զոհեր եւ վիրավորներ: Մի քանի դիակ գտնվում է չեզոք գոտում: Հայկական կողմը զոհեր ու վիրավորներ չունի:
Միեւնույն ժամանակ, ՊԲ համապատասխան կառույցների կողմից տրամադրված հավաստի տվյալների համաձայն՝ արեւելյան ուղղությամբ նկատվում է հակառակորդի կենդանի ուժի եւ զինտեխնիկայի տեղաշարժեր:
ՊԲ առաջապահ զորամասերը շարունակում են վստահորեն իրականացնել իրադրության վերահսկողությունը սահմանի ողջ երկայնքով եւ պատրաստ են հակառակորդի ցանկացած սադրանքի տալ արժանի պատասխան: