Իրավիճակը շփման գծում վերահսկողության տակ է: Այս մասին այսօր` փետրվարի 25-ին, լրագրողների հետ զրույցում ասաց ՀՀԿ-ական պատգամավոր, գեներալ Սեյրան Սարոյանը:
«Հիմա մեր կանտրոլի տակ ա, ամեն ինչ նորմալ ա, մեր զորքերը տիրապետում են իրավիճակին: Ինչպես միշտ ադրբեջանցին զոհեր ա տվել, հիմա խնդրում են իրանց դիակները»,- ասաց Սեյրան Սարոյանը:
Թե ինչի հետ է կապված այս լարվածությունը, գեներալը դժվարանում է նշել. «Աստված չանի, մի բան լինի, ընտրությունները կթողենք ու կգնանք մեր գործն անելու»:
Հիշեցնենք, որ փետրվարի 25-ին՝ ժամը 03:00-ի և 04:00-ի սահմաններում, շփման գծի միանգամից երկու` հարավարևելյան (Մարտունի) և արևելյան (Աննա) ուղղություններով հակառակորդը, օգտագործելով ականազերծման համապատասխան տեխնիկա և հատուկ միջոցներ, ձեռնարկել է հարձակման փորձ։
«ՊԲ առաջապահ ստորաբաժանումները, նաև շնորհիվ տեսադիտարկման սարքավորումների, երկու ուղղություններում էլ ժամանակին հավաստանշել են ադրբեջանական ստորաբաժանումների առաջխաղացումը և կորուստներ պատճառելով հետ շպրտել ելման դիրքեր:
Բանակի առաջապահ ուժերի պատասխան գործողությունների արդյունքում հակառակորդը տվել է զոհեր և վիրավորներ: Մի քանի դիակ գտնվում է չեզոք գոտում: Հայկական կողմը զոհեր ու վիրավորներ չունի»,-ասված է Արցախի ՊԲ մամուլի հաղորդագրությունում: