Ով կարծում է, որ Խորհրդային Հայաստանում կոռուպցիա կար, թող այն համեմատի մեր օրերի հետ: Փետրվարի 27-ի լրագրողների հետ հանդիպմանն այս մասին հայտարարեց Հայաստանի Միացյալ առաջադիմական կոմունիստական կուսակցության նախագահ Վազգեն Սաֆարյանը, որը Հայաստանի կոմկուսի համապետական ընտրական ցուցակի 2-րդ հորիզոնականում է:
Սաֆարյանի խոսքով՝ այն ժամանակվա խոշորագույն պաշտոնյաները նույնիսկ մեկ հարյուրերորդը չունեին, ինչ այսօր ներկայում հավաքում են միջին օղակի ղեկավարները: Խորհրդային ժամանակաշրջանի բոլոր դժվարությունների հետ մեկտեղ, կարելի է պարզապես համեմատել քաղաքացիների ճնշող մեծամասնության կենսամակարդակն այն ժամանակ եւ հիմա, եւ վատ կոմունիստների ու կարմիր սպառնալիքի մասին կարծրատիպերի գերին չմնալ:
«Վերջին երեք գումարման խորհրդարաններում կոմունիստներ չեն եղել: Այս տարիների ընթացքում անկառավարելի շուկայական տնտեսության թերությունները խորացել են: Մարդիկ աստիճանաբար սկսսում են հասկանալ սոցիալական երաշխիքները, որոնք ունեցել են Խորհրդային միությունում: Անվճար կրթություն, բժշկություն, բնակարան, աշխատանքի իրավունք. այս ամենն արդեն սկսել են գնահատել»,- նշեց Վազգեն Սաֆարյանը:
