Նախընտրական քարոզարշավի ժամանակ Հայաստանի Կոմկուսը կկրկնի հանրապետության խորհրդայնացման աշխարհագրական երթուղին։ Այս մասին փետրվարի 27–ին հայտարարել է Միացյալ առաջադիմական կոմունիստական կուսակցության նախագահ Վազգեն Սաֆարյանը։ Նա նշել է, որ կուսակցությունն իր միջոցներով ապահովում է իր բջիջները Խորհրդային Հայաստանի բոլոր 37 շրջաններում։ Դրանցից յուրաքանչյուրում կան ակտիվիստներ, որոնց ոչինչ խոստանալ կամ նվիրել պետք չէ։
«Կուսակցությանը չեն աջակցում ազդեցիկ մարդկանցից ոչ ոք։ Այն ապրում է համեստ, բայց ինքնուրույն։ Մենք կսկսենք Բերդի շրջանից, հետո կլինենք Նոյեմբերյանում եւ Իջեւանում։ Մի խոսքով՝ կկրկնենք 11–րդ Կարմիր բանակի ուղին, որը Հայաստան բերեց Խորհրդային իշխանությունը», - ընդգծել է Սաֆարյանը։
