Հայաստանի կենտրոնական ընտրական հանձնաժողովը փետրվարի 27–ին արտահերթ նիստի ժամանակ վիճակահանության միջոցով բաշխել է վճարովի ու անվճար ժամանակը, որը կհատկացվի ապրիլի 2–ին կայանալիք խորհրդարանական ընտրություններին մասնակցող կուսակցություններին ու կուսակցական դաշինքներին Հանրային հեռուստատեսության ու ռադիոյի եթերում։
Մարտի 5–ից Հայաստանի հանրային հեռուստաընկերության եթերում ամեն օր քարոզարշավը կսկսվի 19։00–ին։ Հանրային ռադիոյի եթերում այն կլինի երկու մասով՝ 13։30–ին՝ անվճար եթեր եւ 21։40–ին՝ վճարովի եթեր։
ԿԸՀ նախագահ Տիգրան Մուկուչյանի խոսքով՝ մարտի 5-31–ը նախընտրական քարոզարշավի ժամանակ Հանրային հեռուստաընկերությունը կուսակցություններին ու կուսակցական դաշինքներին կհատկացնի անվճար 60 րոպե եւ վճարովի 120 րոպե։
Ըստ ԿԸՀ–ի իրականացրած վիճակահանության արդյունքների՝ մարտի 5–ին առաջինն անվճար նախընտրական քարոզարշավ կիրականացնի «Ելք» դաշինքը։ Իսկ քարոզարշավի վերջին օրը՝ մարտի 31–ին, անվճար քարոզարշավի իրավունքից վերջինը կօգտվի «Ծառուկյան» դաշինքը։
ԿԸՀ ղեկավար Տիգրան Մուկուչյանը նաեւ նշել է, որ Հանրային ռադիոն կուսակցություններին ու կուսակցական դաշինքներին կհատկացնի անվճար 120 եւ վճարովի 180 րոպե։