Միացյալ Թագավորությունում ՀՀ դեսպան Արմեն Սարգսյանը փետրվարի 27-ին, հանդիպել է բրիտանական խորհրդարանի Համայնքների պալատի ղեկավար Դեյվիդ Լիդինգթոնի հետ եւ ներկայացրել ԼՂ հակամարտության վերջին զարգացումները:
ԱԳՆ-ից NEWS.am-ին հայտնում են, որ զրուցակիցները գոհունակություն հայտնեցին Հայաստանի Հանրապետության եւ Միացյալ Թագավորության միջեւ դիվանագիտական հարաբերությունների հաստատմանը հաջորդած 25-ամյա ժամանակահատվածում երկկողմ համագործակցության շրջանակներում արձանագրած առաջընթացի համար:
Կողմերը քննարկեցին հայ-բրիտանական փոխգործակցության օրակարգին առնչվող հարցերի լայն շրջանակ, ինչպես նաեւ մտքեր փոխանակեցին Հայաստանում ապրիլին նախատեսված խորհրդարանական ընտրությունների, ինչպես նաեւ խորհրդարանական կառավարման ձեւին Հայաստանի անցման գործընթացում բրիտանական փորձի օգտավետության շուրջ։
Հանդիպման ավարտին ՀՀ դեսպանը Դեյվիդ Լիդինգթոնին ներկայացրեց Արցախյան հիմնախնդրին առնչվող վերջին զարգացումները, մասնավորապես, ապրիլի սկզբին Արցախի դեմ Ադրբեջանի կողմից սանձազերծված ագրեսիայի հետեւանքները եւ դրանց հաղթահարմանն ուղղված՝ Հայաստանի եւ ԵԱՀԿ Մինսկի խմբի համանախագահների ջանքերը։