Մարտի 1-ի զոհերի հիշատակին նվիրված Հայ ազգային կոնգրեսի եւ Հայաստանի ժողովրդական կուսակցության երթը դեպի Մյասնիկյանի արձան ավարտվեց:
Երթի մասնակիցները «Բացահայտել Մարտի 1-ը» գրությամբ մեծ ցուցապաստառով, Մարտի 1-ի զոհերի լուսանկարներով եւ Հայաստանի դրոշով Երեւանի Մաշտոցի պողոտայով քայլեցին Մյասնիկյանի արձանի մոտ եւ ծաղիկներ դրեցին Մարտի 1-ի զոհերի հիշատակին: Ազատության հրապարակից դեպի Մյասնիկյանի արձան երթը հսկող ոստիկանները նույնպես իրենց ձեռքի մեխակները դրեցին արձանի մոտ:
Նշենք, որ ՀԱԿ առաջնորդ Լեւոն Տեր-Պետրոսյանը չէր մասնակցում հանրահավաք-երթին:
Հիշեցնենք, որ ուղիղ 9 տարի առաջ Երեւանի կենտրոնում ողբերգական իրադարձություններ տեղի ունեցան, որի հետեւանքով զոհվեց 10 քաղաքացի: 2008թ. փետրվարի 18-ի նախագահական ընտրություններից հետո ՀՀ առաջին նախագահ Լեւոն Տեր-Պետրոսյանի կողմնակիցները հավաքվել էին Ազատության հրապարակում եւ պահանջում էին ընտրությունների արդյունքների վերանայում: Նրանք 10 օր շարունակ շուրջօրյա հանրահավաքներ էին անցկացնում Ազատության հրապարակում:
Մարտի 1-ի առավոտյան ոստիկանությունը ուժով ցրեց Ազատության հրապարակում հավաքվածներին: Մարդիկ սկսեցին հավաքվել Մյասնիկյանի արձանի մոտ: Նույն օրը երեկոյան երկրի նախագահ Ռոբերտ Քոչարյանն արտակարգ դրություն հայտարարեց, ապա ուժային կառույցները հրազեն կիրառեցին անզեն ցուցարարների դեմ, որի հետեւանքով զոհվեց 10 քաղաքացի, այդ թվում երկու ոստիկան, եւս 200 մարդ տարբեր աստիճանի վնասվածքներ ստացան:
Լուսանկարներն՝ Արսեն Սարգսյանի\NEWS.am