Գերմանացի հյուպատոսները մինչեւ հիմա թույլտվություն չեն ստացել հանդիպել Ստամբուլում կալանավորված Die Welt-ի լրագրող Դենիզ Յուջելին: Այս մասին ճեպազրույցի ժամանակ հայտարարել է Գերմանիայի ԱԳՆ ներկայացուցիչ Մարտին Շեֆերը, փոխանցում է «ՌԻԱ Նովոստի»-ն:
«Իմ տեղեկություններով՝ այսօր առավոտյան հյուպատոսության աշխատակիցները Յուջելին հասանելիություն դեռ չէին ստացել»,- ասել է նա:
Բեռլինի եւ Անկարայի միջեւ հարաբերությունները լարվել են գերմանացի լրագրողին կալանավորելուց հետո: Թուրքիայի իշխանությունները նրան կասկածում են «ահաբեկչական կազմակերպությանն անդամակցելու, տվյալները ոչ իրավաչափ օգտագործելու, ահաբեկչություն քարոզելու մեջ»:
Գերմանիայի կանցլեր Անգելա Մերկելը Անկարայից պահանջել է ազատել Յուջելին եւ պահպանել լրատվամիջոցների ազատությունը: