Ամենայն հայոց կաթողիկոս Գարեգին Երկրորդը պետք է Գարեգին Բեքչյանին շնորհավորի որպես Հայ առաքելական եկեղեցու Պոլսի պատրիարքի ընտրված տեղապահ: Մարտի 18-ին կայացած մամուլի ասուլիսի ժամանակ այս մասին ասաց թուրքագետ Ռուբեն Մելքոնյանը:
Նրա խոսքով՝ դա այն բանի նշանը կլինի, որ աթոռանիստ Էջմիածինը նրան լեգիտիմորեն ընտրված Հայ առաքելական եկեղեցու Պոլսի պատրիարքի տեղապահ է ճանաչում: Թուրքագետի կարծիքով՝ աթոռանիստ Էջմիածնի հապաղումն անընդունելի է:
«Չեմ կարողանում բացատրություն գտնել, թե ինչու ամենայն հայոց կաթողիկոս Գարեգին Երկրորդը չի շնորհավորում ընտրված Գարեգին Բեքչյանին: Լավ, եթե անգամ չի շնորհավորում, թող Սուրբ Էջմիածինը պաշտոնապես արձագանքի ստեղծված իրավիճակին»,- ընդգծեց Ռուբեն Մելքոնյանը:
Թուրքագետի հավաստիացմամբ՝ Պոլսի պատրիարքի միակ լեգիտիմ ընտրված տեղապահը ընտրված Գարեգին արքեպիսկոպոս Բեքչյանն է: «Գարեգին Բեքչյանը պետք է պատասխանատվություն ստանձնի: Ընտրված տեղապահը այսօր չի կարողանում իր պարտականությունների կատարմանն անցնել: Իսկ չընտրված Արամ Աթեշյանը փաստացի շարունակում է իրավիճակը տնօրինել: Նրա հայտարարությունը, թե այդպես է ցանկանում Թուրքիան, հայ հոգեւորականին վայել չէ»,- նշեց Ռուբեն Մելքոնյանը՝ հավելելով, որ իրավական տեսակետից խնդիրը Թուրքիայի իրավասությունների ոլորտում է, իսկ օրենսդրական տեսակետից՝ հայ համայնքի:
«Այս խնդրի լուծման ճանապարհին ամենագլխավոր խոչընդոտը Արամ Աթեշյանն է»,- ընդգծեց թուրքագետը:
Հիշեցնենք, որ մարտի 15-ին կայացած ընտրությունների ընթացքում Հայ առաքելական եկեղեցու Պոլսի պատրիարքի տեղապահ է ընտրվել Գերմանիայի հայկական թեմի առաջնորդ, Գարեգին արքեպիսկոպոս Բեքչյանը: Արամ արքեպիսկոպոս Աթեշյանը, ում ժամանակին Թուրքիայի կառավարությունը Պոլսո հայոց պատրիարքի տեղակալ է նշանակել, իր հերթին, հայտարարել է, որ հրաժարական չի տա: