«Ծառուկյան» դաշինքի առաջնորդ Գագիկ Ծառուկյանն այսօր՝ մարտի 21-ին, Գորիսում ընտրողների հետ հանդիպմանը Սյունիքի մարզպետին մեղադրեց ժողովրդի միջոցով իրեն հարցեր տալու մեջ:
Գագիկ Ծառուկյանը հայտարարեց, որ նորանշանակ մարզպետն ինչ-որ մեկին հրահանգել է իրեն հարցնել 2012թ. նախընտրական ծրագրի մասին:
«Ձեր ուժեղ մարզպետը երեւի նոր ա, ժողովրդի խնդիրներին տեղյակ չէ: Նա պատրաստել էր, որ Ծառուկյանին հարց տան: Ինձ հարցրին՝ պարոն Ծառուկյան, 2012թ.-ին ներկայացրիք ձեր նախընտրական ծրագիրը, բայց բան էլ չարիք: Ես էլ պատասխանեցի՝ քո սովորացնողին ասա, որ պարոն Ծառուկյանը տեսավ, որ 50+1 չհավաքեց, կոալիցիա չմտավ, ինձ որ 4 հատ նախարար են տալիս, բայց որ չես կարողանում որոշում կայացնել օրենք փոխել, հանուն ինչի՞ գնայի: Հիմա էլ եմ ասում՝ եթե կտաք 50+1 ձայն, կկատարվեն առաջին հերթին 15 կետերը»,- ասաց Գագիկ Ծառուկյանը:
Նշենք, որ դաշինքն այսօր նախընտրական հանդիպումներ է ունենում Սյունիքի մարզում: