2016-ի ապրիլյան իրադարձությունները ցույց են տվել «հայ ժողովրդի գենը» գործի մեջ՝ բոլորը տեսան, թե ինչպիսին կարող են լինել հայ տղաները գործի մեջ եւ թե ինչպիսի սխրագործությունների են նրանք ունակ։ Այս մասին մարտի 22-ին Ագարակ գյուղում ընտրողների հետ հանդիպման ժամանակ ասել է ՕՐՕ (Օհանյան-Րաֆֆի-Օսկանյան) դաշինքից պատգամավորի թեկնածու Րաֆֆի Հովհաննիսյանը։
Նրա խոսքով՝ ապրիլյան իրադարձությունների ժամանակ սահմանը պաշտպանող տղաները մեծ քաջություն են դրսեւորել, հետո նրանց են միացել նաեւ կամավորները, եւ նրանք միասին պաշտպանել են հայրենիքը՝ անկախ այն բանից, թե ով է ղեկավարում երկիրը եւ թե ինչպես են նրանք դարձել իշխանության գլուխ՝ արդար ընտրությունների, թե կեղծիքների շնորհիվ։ Րաֆֆի Հովհաննիսյանը նաեւ հավելել է, որ Հայաստանը պետք է դասեր քաղի եւ անհրաժեշտ քայլեր ձեռնարկի, որպեսզի ապագայում Հայաստանում ու Արցախում զոհեր չլինեն։
Խոսելով Արցախյան հակամարտության լուծումների ուղիների մասին՝ Րաֆֆի Հովհաննիսյանը նշել է, որ, իհարկե, նախընտրելի է հակամարտության խաղաղ լուծումը՝ հաշվի առնելով Արցախի ժողովրդի ինքնորոշման իրավունքը։ Անհրաժեշտ է նաեւ Արցախի անկախության ու տարածքային ամբողջականության ճանաչումը։
«Պատերազմին մասնակցող մարդը կձգտի խաղաղության։ Իհարկե, մենք կցանկանայինք հակամարտության խաղաղ լուծում։ Մՙենք ազատագրել ենք մեր հայրենիքը, Արցախը հանրապետություն է դարձել, ունի իր սահմանադրությունն ու սահմանները։ Երբ Արցախի անկախությունն ու տարածքային ամբողջականությունը ճանաչվի կամ երբ Արցախը միանա Հայաստանին,արդեն հնարավոր կլինի եռակողմ բանակցություններ կազմակերպել՝ Բաքու-Ստեփանակերտ-Երեւան՝ լուծելու համար փախստականների, ապառազմականացման հետ կապված եւ այլ հարցեր», - ասել է Րաֆֆի Հովհաննիսյանը։