Եթե իմ մշակած 15 կետերը չընդունվեն, իմացեք, որ ապրիլի 3-ի հետո ավելի վատ է լինելու: Այս մասին այսօր՝ մարտի 23-ին, Սեւան քաղաքում ընտրողների հետ հանդիպման ժամանակ հայտարարել է «Ծառուկյան» դաշինքի առաջնորդ Գագիկ Ծառուկյանը:
Նրա հետ հանդիպման սկզբում ներկաների միջեւ հրմշտոց էր սկսվել, թե ով ավելի մոտ պետք է կանգնի Ծառուկյանին: Սա դուր չեկավ դաշինքի առաջնորդն եւ նա հայտարարեց, որ մինչեւ իրեն չլսեն, չի խոսի. «Եթե լսելու եք ասեմ, եթե չէ...»:
NEWS.am-ի թղթակիցը հայտնում է, որ սեւանցիները Գագիկ Ծառուկյանին ձիով դիմավորեցին եւ ուղեկցեցին մինչեւ հանդիպման վայր: Բացի նամակներ փոխանցելուց, բնակիչները իրենց երեխաներին Ծառուկյանի գիրկն էին տալիս, նա էլ երեխաներին օդ թռցնելով հասավ ամբիոնի մոտ:
«Սիրելի ժողովուրդ պետք է հնարավորություն տալ մեզ, որ մենք կարողանանք համակարգ փոխել, օրենք փոխել, պայման ու հնարավորություն ստեղծել: Այնպես չի որ եկել ենք ասենք մեզ ձայն տաք, մտնենք խորհրդարան, մենք էլ մեր կաշին փրկենք: Ուզում ենք, որ մեզ տաք 50+1, որ նույն պահին համակարգ փոխվի, օրենք փոխվի: Դուք պետք է հասկանաք, թե ով է հենց այնպես խոսում զուտ խորհրդարան մտնելու համար, ով է իսկապես ուզում փոփոխություն մտցնի»,- ասաց Գագիկ Ծառուկյանը:
Նշենք, որ նախքան դաշինքի թեկնածուների ժամանումը, Սեւանի մշակույթի շենքի բակում բացօթյա համերգ էին կազմակերպել: Ելույթ էին ունենում երգչուհի Աննա Խաչատրյանն ու Արսեն Գրիգորյանը: Մի քանի երգ կատարելուց հետո երգիչները շտապեցին լքել ընտրողների հետ հանդիպման վայրը, բայց նրանց մեքենան խցանվեց դաշինքի մեքենաների մեջ:
