Էս ժողովրդին հիմնականում էս օրը դրել են լրատվամիջոցները, որ մարդկանց թյուրիմացության մեջ են դնում: Դիլիջանում լրագրողների հարցերից զայրացած հայտարարել է «Ծառուկյան» դաշինքի ցուցակը գլխավորող Գագիկ Ծառուկյանը:
Դիլիջանում ընտրողների հետ հանդիպումից հետո դիլիջանցիները Գագիկ Ծառուկյանին թույլ չէին տալիս մոտենալ մեքենային եւ հեռանալ:
Դիլիջանցիներից մեկը Գագիկ Ծառուկյանից խնդրեց իրեն օգնել բուժվելու մեկնել արտերկիր: Երիտասարդը պատմեց, որ բանակում է վիրավորվել, բայց Հայաստանում բուժվել չի կարող: Ծառուկյանն էլ խոստացավ ուղարկել բուժման, երբ անձնագրի շենգեն վիզայի հարցը լուծի: Դաշինքի ղեկավարը երիտասարդին կանչեց իր մոտ, հենց արտերկիր մուտք գործելու թույլտվություն ունենա:
Դիլիջանցի պապիկներից մեկն էլ Ծառուկյանին խորհուրդ տվեց հետեւել, որ «ընտրությունները կեղծեն ոչ»:
«Չեն կեղծի, հայրիկ ջան: Ձեր ձայներից է կախված: Դուք եք ամեն ինչ որոշում: Ձայները չեն կեղծի»,- ասաց Ծառուկյանը:
Դիլիջանում Գագիկ Ծառուկյանին զայրացրեց հանդիպմանը ներկա եւ այն լուսաբանող լրագրողների հարցերը: Նա չպատասխանեց որեւէ հարցի, բարձրացավ մեքենայի ոտնահարթակին եւ բարձրաձայն ասաց.
«Էս ժողովրդին հիմնականում էս օրը դրել են լրատվամիջոցները, որ մարդկանց թյուրիմացության մեջ են դնում: Անընդհատ բզբզելով, ձեր էրեսից ժողովուրդն էս օրին է, մարդկանց խառնաշփոթության մեջ են դնում, թե բա բոլոր ուժերը նույնն են, մեկ են: Ինձ համար, իմ ժողովրդի համար ամենակարեւորը իմ 15 կետերն են, որ ես պարտավոր եմ իմ ժողովրդի համար անեմ: Եթե այդ 15 կետերը չեղան, ուրեմն ոչ մի բան էլ չի լինելու»,-զայրացավ Ծառուկյանն ու նստեց մեքենան: