Արագածոտնի մարզի Ապարան քաղաքում այսօր՝ մարտի 25-ին, ընտրողները բարձրաձայնել են գործող հիմնական դպրոցներից մեկի վերանորոգման անհրաժեշտությունը:
NEWS.am-ի թղթակիցը հաղորդում է, որ ՀՀԿ նախագահի առաջին տեղակալ, վարչապետ Կարեն Կարապետյանին դիմեց դպրոցներից մեկի տնօրենն ու խնդրեց լուծել վերանորոգման հարցը;
«Ապարանի մայր դպրոցն է, բայց պայմանները վատն են»,- ասաց վարչապետը:
Կարեն Կարապետյանը հետաքրքրվեց՝ որն է մայր դպրոցը:
«Ուզում ես՝ դպրոցի անունը մայր դիր, հայր դիր, եթե չես կարողանում երեխայի համար լավ պայմաններ ապահովել, աշակերտը չի գալու քո մոտ: Ես չգիտեմ՝ վերանորոգելու ենք այդ դպրոցը, թե ոչ: Արթիկում մի պարզ լուծում ենք արել: Յոթ րոպեի ճանապարհ է մի դպրոցից մյուսը. մի դպրոցը շատ խոնավ է, էն մյուս դպրոցն էլ թերլցված էր, որոշեցինք խոնավ դպրոցից երեխաներին տեղափոխել այդ լավ դպրոցը: Խոնավ պայմաններ ունեցող դպրոցն էլ վաճառեցինք ու էն մյուս դպրոցում այնպես ենք անում, որ երեխաների համար նորմալ պայմաններ ստեղծենք»,- ասաց վարչապետը:
Կարեն Կարապետյանի խոսքով, եթե Եվրոպայում մի աշակերտին հասնում է 7-10 քառակուսի մետր, ապա Հայաստանում մի աշակերտի հասնում է 15-20 քառակուսի մետր, այսինքն երկու անգամ ավելի տեղ կա:
«Սա նշանակում է՝ առանց այն էլ քիչ փող ունենք, մի հատ էլ օդն ենք տալիս: Ձեր համայնքում կա երկու հիմնական դպրոց. Մեկում սովորում է 480 երեխա, մյուսում 220, մինչդեռ ցանկացածում կարող է սովորել մինչեւ հազար աշակերտ: Ինչո՞ւ ենք երկու դպրոց պահում, որ երկու դիրեկտոր պահե՞նք: Պետք է քննարկեք հաստատուն ծախսերը, ձեր համայնքապետի փոխարեն ես կասեի՝ եկեք էս շենքը վաճառենք, 780 երեխայի համար էլ կուկլա դպրոց սարքենք: Էսօր ճիշտ չեք կարողանում ձեր ռեսուրսն օգտագործել»,- նշեց Կարեն Կարապետյանը: