Արագածոտնի մարզի Ապարան քաղաքում այսօր՝ մարտի 25-ին, Հանրապետական կուսակցության նախընտրական հանդիպման ժամանակ ընտրողներից մեկը վարչապետ Կարեն Կարապետյանին խնդրեց իրենց կոոպերատիվին կոմբայն նվիրել:
«Պարոն Կարապետյան, 200 հոգի միավորվել ու կոոպերատիվ ենք ստեղծել: Երկու տրակտոր է պետությունը մեզ տրամադրել, բայց հունձքի համար մեզ կոմբայն է պետք: Եթե կոմբայն ունենանք, մեր գործը կհեշտանա, արտադրանքն էլ կշատանա»,- վարչապետին դիմեց կոոպերատիվի նախագահը:
Կոոպերատիվը ստեղծվել է 2015թ.-ին, սակայն անհրաժեշտ գյուղտեխնիկան ստացել է միայն 2016թ. հոկտեմբերի սկզբին: Տնօրենը հույս հայտնեց, որ եթե կոմբայնը տրամադրեն, այս տարին արդեն 200 տնտեսության համար ավելի արդյունավետ կլինի:
«Շահույթ հետապնդո՞ւմ է ձեր կոոպերատիվը»,- հետաքրքրվեց Կարեն Կարապետյանը: Հարցին ի պատասխան ապարանցին նշեց, որ կոոպերատիվն օրենքի համաձայն շահույթ հետապնդել չի կարող, նպատակն է հոգալ կոոպերատիվի անդամների կարիքները: Պատասխանը վարչապետին զարմացրեց:
«Ձեր կոոպերատիվը մեռնելու է, որովհետեւ քոքից սխալ գործ եք բռնել: Էդ կոմունիզմը ձեր մեջ որտեղի՞ց, չեմ հասկանում: Էդ կոոպերատիվին կոմբայն են տալու, տանելու եք այստեղ, այնտեղ, ոչ ծրագիր եք ունենալու, ոչ շահույթ եք ունենալու: Ծրագիրը գրում ես, եթե շահույթ ես ունենալու, ես կոմբայնը տալու եմ, բայց ես շատ խիստ հետեւելու եմ: Դուք ապագա չունեցող բան եք սկսել»,- ասաց Կարեն Կարապետյանը:
