Իրաքի Մոսուլ քաղաքում փլված շենքի ավերակների տակից հանել են 61 մարդու մարմին, հայտնում է «Ռոյթեր» գործակալությունը՝ վկայակոչելով զինվորականների հայտարարությունը։
Տեղի բնակիչների խոսքով, մարտերի ժամանակ շենքի մոտ հրաձգություն էին սկսել ԻՊ խմբավորման զինյալները, հետո նրանք մարդկանց փակել էին շենքի նկուղում, ականապատել շենքը, որպեսզի այն օգտագործեն որպես «կենդանի վահան», ասվում է հրամանատարության հայտարարության մեջ։
Կոալիցիայի ներկայացուցիչները հայտնել են, որ օդային հարվածներ են հասցրել այդ թաղամասում որտեղ գտնվում էր տվյալ շենքը, սակայն պնդում են, որ շենքը ավիացիայի գործողությունների հետեւանքով չի փլվել։ Ականատեսների խոսքով, կոալիցիայի օդանավերը փորձել են ոչնչացնել ականապատ մեքենան, որը հայտնաբերվել է շենքի մոտ։
Վերջին օրերին Մոսուլից հաղորդագրություններ են ստացվում քաղաքի արեւմտյան մասում ավիահարվածների հետեւանքով մեծաքանակ զոհերի մասին։ Քրդական հեռուստաալիքը հայտնել էր, որ ալ Ջադիդ թաղամասի ռմբակոծության հետեւանքով ավելի քան 200 մարդ է զոհվել՝ թե խաղաղ բնակիչներ, թե զինյալներ, որոնք նրանց տներում էին թաքնվել։
Հակաահաբեկչական կոալիցիան, ԱՄՆ ղեկավարությամբ, հայտնել է, որ կհետաքննի այդ միջադեպերը։