«Ելք»-ի հաղթանակի դեպքում դպրոցի տնօրենները իրավունք չեն ունենա լինել որեւէ կուսակցության անդամ: Այս մասին այսօր` մարտի 27-ին, Արարատի մարզում իրականացվող քարոզարշավի ժամանակ հայտարարել է «Ելք» դաշինքի երրորդ հորիզոնականը զբաղեցնող Նիկոլ Փաշինյանը` խոսելով «Իրազեկ քաղաքացիների միավորում» ՀԿ-ի կողմից հրապարակված թվով 84 դպրոցի եւ 30 մանկապարտեզի տնօրենների արարքի մասին, թե ինչպես են ցուցակներ հավաքագրում ՀՀԿ-ի համար:
Փաշինյանի խոսքով` դպրոցներում իհարկե կան ազնիվ ուսուցիչներ, եւ նրանք պետք է հիմա գործադուլներ հայտարարեին, ցույցեր կազմակերպեին քաղաքական պոռնկությամբ զբաղվողների դեմ:
«ՀՀ ժողովուրդը իր սուղ եւ աղքատիկ բյուջեից տարեկան համարյա 200 մլրդ դրամ է հատկացնում, որպեսզի կազմակերպի իր երեխաների, իր զավակների կրթությունը հանրակրթական դպրոցներում, բայց պարզվում է, որ այդ գումարները տնօրինող առնվազն 114 դպրոցի տնօրենները եւ մանկապարտեզի վարիչները փոխարենը երեխաների կրթական հարցերով զբաղվելու, փոխանակ նրանց որպես քաղաքացի, որպես մարդ, որպես հայ դաստիարակելու, նրանք զբաղված են Հանրապետական կուսակցության անդամների, Սամվել Ալեքսանյանների, Առաքել Մովսիսյանների, Միհրան Պողոսյանների, Ռոբերտ Սարգսյանների համար ցուցակներ հավաքագրելով»,-ասաց նա:
Նիկոլ Փաշինյանի խոսքով`տնօրենների կողմից ցուցակագրումը օրինական համարելը պարզապես ամոթալի է. «Այսօր ՀՀԿ-ն ասում է, որ ցուցակագրումը տնօրենների կողմից օրենքին չի հակասում, եթե այդ հարթության մեջ քցենք, ապա Երեւանյան լճի մոտ կանգնող պոռնիկների գործունեությունը նույնպես օրինական է: Հայոց դպրոցից պետք է արմատախիլ անել քաղաքական պոռնիկներից, նրանց պետք է դուրս շպրտել դպրոցներից»:
