Հայաստանի խորհրդարանական ընտրություններին մասնակցող 9 քաղաքական ուժերից ՀՀԿ-ից բացի միայն 2 ուժ է հստակ հայտնել արտաքին քաղաքականության հարցում իր մոտեցումների մասին։ Այս մասին մարտի 27-ին հայտնել է Հայաստանի պաշտպանության նախարար, ՀՀԿ համապետական ցուցակի առաջին համար Վիգեն Սարգսյանը, ռազմահայրենասիրական դաստիարակության ու պաշտպանության ոլորտի հասարակական կազմակերպությունների համաժողովի ընթացքում։

Նախարարի խոսքով, դա ցույց է տալիս, որ այդ ուժերը, ընտրվելու դեպքում պատասխանատու են լինելու միայն երկրում տնտեսական բաշխման համար։ «Նրանք խոսում են աշխատավարձերի բարձրացման մասին, դա նշանակում է, որ նրանք առաջարկում են նվազեցնել բանակի ծախսերը։ Ես որպես պաշտպանության նախարար, ամենաերջանիկ մարդը կլինեի, եթե սպան վարձատրվեր միջազգային ստանդարտների համապատասխան»,- շեշտել է ՎԻգեն Սարգսյանը։ Հանրապետությունում, շարունակել է նա, միջին աշխատավարձը կազմում է 180 հազար դրամ։ Դա, ըստ նախարարի, երկրորդ միջին աշխատավարձն է հետխորհրդային տարածքում՝ Ռուսաստանից հետո։

«Ես ափսոսում եմ, որ մեր գործընկերները խուսափեցին բաց բանավեճերից»,- նշել է Վիգեն Սարգսյանը։ Բանավեճեր անցկացնելու առաջարկը, նրա խոսքով, ընդունել են միայն ՀՅԴ-ն ու Ելք դաշինքը։ «Դա պետք է մտահոգի մեր հասարակությանը՝ այսինքն, այն մարդիկ, որոնք չեն ընդունել այդ առաջարկը, թաքցնելու բան ունեն»,- հավելել է նախարարը։