Նախընտրական քարոզարշավը հաջողվեց կազմակերպել հիմնականում այնպես, որպեսզի զերծ մնանք բեւեռացումից, սրացումից, այս առումով աննախադեպ քարոզարշավ է, եւ սա միայն ՀՀԿ-ի լուման չէ: «Մեդիա կենտրոն»-ում այսօր՝ մարտի 28-ին լրագրողների հետ հանդիպման ժամանակ այս մասին հայտարարեց ՀՀԿ փոխնախագահ Արմեն Աշոտյանը՝ անդրադառնալով հետընտրական մթնոլորտի, տարբեր քաղաքական ուժերի կողմից արդեն իսկ հնչող տարատեսակ կոչերի մասին հարցին:
«Չեմ ուզում Կիկոսի մահը սարքենք՝ արդեն խոսելով հետընտրական շրջանի մասին: Բայց վստահ եմ, որ հետընտրական շրջանում նույնպես քաղաքական ուժերը կմնան քաղաքական բարեկրթության եւ օրենքի շրջանակում»,- ասաց Աշոտյանը:
Նա նշեց, որ միջազգային սեւեռուն ուշադրություն կա այս ընտրությունների հանդեպ, եւ առաջարկեց հիշել քաղաքական ժեստերը նախագահ Սերժ Սարգսյանի՝ Բրյուսել, Մոսկվա եւ Փարիզ կատարած այցերի ընթացքում:
«Միջազգային գործընկերների կողմից կա հավատ եւ վստահություն ՀՀԿ-ի հանդեպ, դրա մասին է վկայում նաեւ ԵԺԿ նախագահի բաց ուղերձը, որը կոչ արեց զերծ մնալ պոպուլիզմից եւ ծայրահեղությունից»,- հավելեց Արմեն Աշոտյանը:
