Խորհրդարանական ընտրություններում առաջադրված 9 կուսակցություններից ու դաշինքներից հիմնական մրցակցությունը ծավալվում է Հայաստանի Հանրապետական կուսակցության և «Ծառուկյան» դաշինքի միջև։ Այս մասին այսօր՝ մարտի 28–ին, լրագրողների հետ հանդիպմանը ասել է Հասարակական կարծիքի հետազոտության համառուսաստանյան կենտրոնի (ВЦИОМ) ղեկավար Վալերի Ֆյոդորովը՝ ներկայացնելով Հայաստանում նախընտրական քարոզչության ժամանակ կենտրոնի իրականացրած նոր հարցումների արդյունքները։
Քարոզարշավի մեկնարկից առաջ ВЦИОМ-ի իրականացված առաջին հարցման արդյունքների համեմատ, ՀՀԿ վարկանիշը բարձրացել է 2 տոկոսով՝ կազմելով 21 տոկոս և գրեթե հավասարվել «Ծառուկյան» դաշինքի վարկանիշին, որը կազմում է 22 տոկոս և նախորդ հարցման ցուցանիշի համեմատ նվազել է 4 տոկոսով:
Միեւնույն ժամանակ, ըստ Ֆյոդորովի, տարածքային թեկնածուների եւ կուսակցությունների գումարային արդյունքներով՝ առաջատարը ՀՀԿ-ն է եւ այս ցուցանիշով 8 տոկոսով գերազանցում է «Ծառուկյան» դաշինքին ։ Ըստ այդմ, կողմնորոշված ընտրազանգվածի մեջ ՀՀԿ-ն ունի 44, «Ծառուկյան» դաշինքը՝ 36 տոկոս ձայն:
Բացի այս երկու ուժերից, ըստ ВЦИОМ-ի, խորհրդարանում հայտնվելու հնարավորություն ունի «Ելք» դաշինքը, որի օգտին պատրաստ է քվեարկել ընտրողների 6 տոկոսը, ՀՅԴ–ն՝ 5 տոկոս և «Հայկական վերածնունդը»՝ 4 տոկոս:
Հարցվածների 40%–ը դեռ չի կողմնորոշվել, կամ հրաժարվել է պատասխանել հարցին։
Հարցումն անցկացվել է «Շանթ» հեռուստաընկերության պատվերով մարտի 17-24-ը Հայաստանի ամբողջ տարածքում։ Հարցմանը մասնակցել է 1600 քաղաքացի:
