Չինացու ընտանիքը, որին Փարիզում ոստիկանը սպանել էր այն բանից հետո, երբ նա սառը զենքով հարձակվել էր մեկ այլ իրավապահի վրա, ներկայացրել է իրադարձությունների իր տարբերակը, հայտնում է ՌԻԱ Նովոստին։
Ավելի վաղ հայտնել էին, որ ոստիկանությունը ահազանգ էր ստացել կենցաղային բռնության մասին։ Ժամանելով դեպքի վայր ու լսելով երեխաների բղավոցներ՝ ոստիկանները ստիպված են եղել կոտրել դուռը։ Նրանց ընդառաջ է եկել ասիական ծագումով մի 50-ամյա տղամարդ, ձեռքին մկրատ ու վիրավորել ոստիկաններից մեկին։
Այդ ժամանակ երկրորդ ոստիկանը կրակ է բացել։ Ոստիկանության տվյալներով, իրավապահը կրակել է միայն մեկ անգամ ինքնապաշտպանության նպատակով, սակայն փամփուշտը դիպչել է հարձակվողի կրծքին ու նա մահացել է։
Իսկ ընտանիքի խոսքով, դստրերից մեկը դռան թակոց է լսել ու գնացել է դուռը բացելու։ Ավելի ուշ դռանը մոտեցել է նաեւ հայրը։ Նրա ձեռքին մկրատ է եղել, քանի որ մինչ այդ նա ձուկ էր կտրատում։ Դռան թակոցը ուժեղացել է։ Ընտանիքը խնդրել է ոստիկաններին հանգստանալ, բայց նրանք կոտրել են դուռը, ու լսվել է կրակոց, նշվում է հաղորդագրության մեջ։
Հանգուցյալի ընտանիքը այսօր պետք է հանդիպի ոստիկանության հետ։ Նրանք մտադիր են բողոք ներկայացնել։