Հայաստանի հանրապետական կուսակցության մամուլի խոսնակ Էդուարդ Շարմազանովը «Ծառուկյան» դաշինքի շտաբի պետի Իշխան Զաքարյանի հայտարարությունը, թե խորհրդարանական ընտրություններին դաշինքը համոզիչ հաղթանակ է տանելու, «ապրիլմեկյան կատակ» է որակում:
«Երբ Իշխան Զաքարյանը խոսում էր, ակամայից հիշեցի Օտտո ֆոն Բիսմարկին, որն ասում էր՝ «Երբեք այդքան սուտ բաներ չեն ասում, որքան ընտրություններից առաջ, գործից հետո եւ պատերազմի ժամանակ»: Եթե պարոն Իշխան Զաքարյանը ցանկացել է ապրիլի 1-ին ընդառաջ ապրիլմեկյան կատակ անել, ասեմ, որ հաջողված էր: Ամեն ինչը կորոշի ընտրողը, մենք մեր շանսերը շատ բարձր ենք գնահատում, բայց իր նման չենք ասում՝ համոզիչ հաղթանակ եւ այլն»,-այսօր՝ մարտի 29-ին, NEWS.am-ի հետ զրույցում ասաց նա:
Էդուարդ Շարմազանովը Հայաստանի հանրապետական կուսակցության քարոզարշավը գնահատեց պոզիտիվ եւ հաջողված՝ նշելով, որ հանրապետականը բոլոր շանսերն ունի ընտրություններում հաղթելու:
«Մենք գտնում ենք, որ հանրապետական կուսակցությունն այս պահին ընտրական մարաթոնի ֆավորիտն է, աներկբա է, որ ընտրությունների արդյունքում հանրապետականը մարաթոնյան ֆինիշին առաջին տեղում է լինելու: Թե քանի տոկոս կլինի, միայնակ կառավարություն կձեւավորենք, թե կոալիցիոն գործընկերների հետ՝ արդեն հետընտրական զարգացումները ցույց կտան: Ամենակարեւորն այն է, որ հանրապետականին հաջողվել է կազմակերպել նորմալ, պոզիտիվ քարոզարշավ, հանրությունից ստացել ենք դրական սիգնալ»,-ասաց նա:
Ավելի վաղ տեղեկացրել էինք, որ «Ծառուկյան» դաշինքի ամփոփոխիչ միջոցառման ժամանակ դաշինքի շտաբի պետ Իշխան Զաքարյանը հայտարարել էր, որ խորհրդարանական ընտրությունների արդյունքում իրենք համոզիչ հաղթանակ են տանելու: