Մեկ տարի առաջ չորսօրյա պատերազմում մենք հետ մղեցինք հակառակորդին, դա հնարավոր եղավ, սակայն, թանկ զոհերի գնով: Այս մասին, հայտարարություն է տարածել «Կոնգրես-ՀԺԿ» դաշինքը:
Հայտարարությունում ասվում է.
«Այսօր լրանում է Ապրիլյան պատերազմի զոհերի առաջին տարելիցը։ Մեկ տարի առաջ ադրբեջանական զինված սադրանքը հերթական անգամ հանդիպեց հայ ժողովրդի միհամուռ հակահարվածին։ Չորսօրյա պատերազմում մենք կարողացանք ետ մղել հակառակորդին ու խափանել նրա նենգ ծրագրերը։ Դա հնարավոր եղավ, սակայն, թանկ զոհերի գնով, նրանք հերոսացան հանուն Արցախի և Հայաստանի, հանուն բոլորիս ապահովության, անվտանգության ու խաղաղ կյանքի։
Կոնգրես-ՀԺԿ դաշինքը, հարգանքի տուրք մատուցելով Ապրիլյան պատերազմում զոհված զինվորականների, ազատամարտիկների հիշատակին, ևս մեկ անգամ ցավակցում և իր զորակցությունն է հայտնում նրանց հարազատներին, մերձավորներին ու մտերիմներին։ Նրանց և Արցախյան պատերազմի զոհերի հիշատակի անմոռաց հուշարձանը կդառնա խաղաղության հաստատումը, պատերազմի բացառումը, Արցախի և Հայաստանի ծաղկումն ու հզորացումը»:
Նշենք, որ այսօր՝ ապրիլի 2-ին, «Կոնգրես-ՀԺԿ» դաշինքի անդամներն այցելել են «Եռաբլուր» պանթեոն եւ հարգանքի տուրք մատուցել Ապրիլյան պատերազմում զոհված զինվորականների, ազատամարտիկների հիշատակին: