Հայաստանյան խորհրդարանական ընտրություններին անդրադարձել են համաշխարհային առաջատար լրատվական գործակալությունները։
Գործակալությունները շեշտում են Հայաստանում խորհրդարանական ընտրությունների նշանակությունը, երկրում խորհրդարանական կառավարման ձեւին անցնելու կապակցությամբ։
«Քննադատները այդ փոփոխություններն ընկալել են որպես նախագահ Սարգսյանի ջանքերի մի մաս՝ պահպանել երկրի նկատմամբ վերահսկողությունը 2018-ին պաշտոնավարությունն ավարտելուց հետո։ Եթե նրա կուսակցությունը վերահսկի խորհրդարանը, նա կարող է նախագահի պաշտոնը լքելուց հետո վարչապետ նշանակվել»,- գրում է Associated Press–ը։
Հոդվածում նշվում է, որ ԵՄ-ն ֆինանսական ու տեխնիկական աջակցություն է հատկացրել անկախ ու ազատ ընտրություններ անցկացնելու համար։
Euronews-ը հայտնում է, որ հայ ընտրողները քվեարկում են նոր խորհրդարանի համար «իշխող կուսակցության ու կոալիցիայում նրա նախկին գործընկերոջ միջեւ նախընտրական լարված պայքարից հետո»։ Շեշտում են, որ արդեն հայտնվում են ահազանգեր քվեարկության ընթացքում տեղ գտած խախտումների մասին ու կա վտանգ, որ երկրում կարող են անկարգություններ բռնկվել։
AFP գործակալությունն էլ իր հերթին է նշում, որ Արեւմուտքը դիտարկում է այս ընտրությունները որպես առանցքային փորձություն երկրի ժողովրդավարության համար, որը «չունի ընտրությունների ճանապարհով իշխանությունը ընդդիմությանը փոխանցելու պատմություն»։
Պատմելով Հայաստանում կարեւոր ընտրությունների մասին՝ Reuters գործակալությունը նշում է, որ շատ հայեր մեղադրում են կառավարությանը կոռուպցիայի ու երկրի տնտեսության սխալ կառավարման մեջ։ «Քաղաքական վերլուծաբանները ասում են, որ քվեարկությունից հետո հնարավոր են անկարգություններ՝ մասամբ տնտեսական անկման կապակցությամբ աճող դժգոհության պատճառով»,- գրում է գործակալությունը։
