Վարչապետ Կարեն Կարապետյանի վարկանիշը շատ բարձր է, եւ ընտրազանգվածի ինչ-որ մասը, արհամարհելով Հայաստանի Հանրապետական կուսակցությանը, ՀՀԿ-ի օգտին քվեարկեց, որպեսզի Կարապետյանը վարչապետ մնա: Ապրիլի 4-ին՝ լրագրողների հետ հանդիպման ժամանակ այս մասին ասաց քաղտեխնոլոգ Կարեն Քոչարյանը:
Նրա խոսքով՝ իշխանությունը հասկացավ, որ «Սասնա ծռեր» զինված խմբավորման գորոծողություններից հետո փոփոխություններ են անհրաժեշտ: «Եվ Կարեն Կարապետյանին բերեց, որը սկսեց որոշակի բարեփոխումներ իրականացնել: Կարծում եմ, որ սա ընտրությունների արդյունքների վրա լուրջ ազդեցություն ունեցավ»,- նշեց Քոչարյանը:
Ըստ նրա՝ Հայաստանի համար առաջին խնդիրը թագավորող տոտալ անարդարությունն է, երկրորդ՝ սոցիալական վիճակը: «Այսինքն՝ եթե ներկայիս գործադիր իշխանությունը կարողանա անարդարության մթնոլորտի իրավիճակը փոխել, ինչ-որ չափով կբարելավվի նաեւ սոցիալ-տնտեսական վիճակը, եւ «Սասնա ծռերի» գործողությունների կրկնողություն կամ այլ տեսակի դժգոհություն չի լինի»,- ընդգծեց Կարեն Քոչարյանը՝ հավելելով, որ եթե այս 2 ուղղություններում իրավիճակը չբարելավվի, ապա հակառակ պատկերը կստացվի: