Հայաստանում քարանձավները կծառայեն միայն զբոսաշրջության զարգացման համար։ Այս մասին ապրիլի 18-ին լրագրողների հետ հանդիպմանն ասել է ՀՀ մշակույթի նախարար Արմեն Ամիրյանը։
Խոսելով ՀՀ մշակույթի նախարարության՝ հանրապետության քարանձավները վարձակալությամբ հանձնելու նախաձեռնության մասին՝ Ամիրյանը նշել է, որ ցանկացած քարանձավի կամ պատմամշակութային հուշարձանի շահագործումն ու պահպանումը նրանք կօգտագործեն՝ ըստ օրենքների ու զբոսաշրջության զարգացման նպատակով։
«Դա շատ կարեւոր է։ Մենք արձանագրել ենք, որ մարդիկ գումար են վերցնում, որ զբոսաշրջիկներն այնտեղ մտնեն։ Այսօր մեր քարանձավներն անմխիթար վիճակում են։ Նրանք ապօրինաբար տոմսեր են վաճառում, դրա միջոցով գումար վաստակում։ Ո՞վ է դա վերահսկում։ Ոչ ոք։ Ունենալով հստակ պայմանագրեր, պայմանավորվածություններ՝ մենք կկարողանանք վերահսկել այն եւ ապահովել հետագա գիտահետազոտական աշխատանքների իրականացումն այդ քարանձավներում, եւ այդ քարանձավների նշանակության մասին տեղեկությունը կտարածենք ամբողջ աշխարհում»,- ընդգծել է Ամիրյանը։
Նախարարի խոսքով՝ կա զբոսաշրջություն, կան քարանձավներ, կա ապօրինի գումարային շրջանառություն։
«Թույլ տանք, որ ապօրինի գումարային շրջանառություն լինի՞։ Կարծում եմ, որ ոչ։ Մրցույթը հենց այդ նպատակով է»,- հավելել է Արմեն Ամիրյանը։ Բոլորին, ովքեր կողմ են կամ դեմ քարանձավը վարձակալությամբ հանձնելուն, ապրիլի 19-ին ժամը 14։00-ին նա հրավիրել է նախարարություն՝ զրուցելու։
NEWS.am-ի թղթակցի հարցին, թե ինչպես պետք է տեղի ունենա քարանձավները վարձակալությամբ հանձնելը, նա պատասխանել է. «Մենք մրցույթ ենք հայտնարարել, կհայտնվեն դրա մասնակիցները։ Մենք նրանց հետ կքննարկենք վերջնական պայմանները եւ պայմանագրեր կկնքենք»։
Մրցույթի նախնական փուլը նախատեսված է մայիսի 17-ին։
Հիշեցնենք, որ օրերս ՀՀ մշակույթի նախարարությունը հանդես է եկել քարանձավները վարձակալությամբ հանձնելու նախաձեռնությամբ, այդ թվում՝ Արենի-1-ը։ Հենց Արենի-1 քարանձավում 2008թ.-ին հայտնաբերվել են աշխարհի հնագույն կոշիկն ու «գինու գործարանը»։ Մասնագետները պնդում են, որ քարանձավը հնարավոր չէ վարձակալությամբ հանձնել, քանի որ պատմական հուշարձանը կոչնչանա։
