Պետերբուրգյան մետրոյում ահաբեկչության կազմակերպման մեջ կասկածվող Աբրոր Ազիմովը դատարանում հայտնել է, որ չի ընդունում իր մեղավորությունը, հայտնում է Ինտերֆաքսը։
«Ես համաձայն եմ կալանավորման հետ, սակայն ես չեմ ասել, որ որեւէ առնչություն ունեմ պայթյունի հետ։ Ես մասնակցություն ունեցել եմ, բայց ոչ անմիջական»,- ասել է Ազիմովը։
Ազիմովը պատմել է, որ իրեն «հրահանգներ են տվել» ու ինքը «չի գիտակցել, որ մասնակցում է ահաբեկչության կազմակերպմանը»։ Թե հատկապես ով ու ինչ հրահանգներ է տվել Ազիմովին, պարզ չէ։
Ավելի վաղ Ազիմովի փաստաբանը հայտնել էր, որ նա ընդունել է իր մեղավորությունը։
ԱԴԾ-ն համարում է, որ ծնունդով ղրղզստանցի Աբրոբ Ազիմովը վարժեցրել է Սանկտ Պետերբուրգի մետրոյում ինքն իրեն պայթեցրած Ակբարժոն Ջալիլովին։ Ազիմովին ձերբակալել ենապրիլի 17-ին։
Հիշեցնենք, որ ապրիլի 3-ին մահապարտ ահաբեկիչը ինքն իրեն պայթեցրել էր պետերբուրգյան մետրոյի վագոնում՝ սպանելով 14 մարդու։ Մինչ այդ ահաբեկիչը մեկ այլ կայարանում էլ էր պայթուցիկ սարք տեղադրել, որը հաջողվել է վնասազերծել։