Երեւանում այսօր՝ ապրիլի 19-ին, մեկնարկել է «Ելք» դաշինքի դրամահավաքի երեկոն, որի արդյունքում հավաքված գումարն ուղղվելու է մայիսի 14-ին կայանալիք Երեւանի ավագանու ընտրությունների քարոզարշավի ծախսերը հոգալուն:
Այն մեկնարկեց «Էրեբունի-Երեւան» երգով՝ «Ելք» դաշինքի անդամների կատարմամբ, Արամ Սարգսյանը երգը լսելուց հետո նշեց. «Իզուր էի կատակներ անում, 2017 թ. «Եվրատեսիլին» հանգիստ կարող ենք մասնակցել այդ երգով»:
Նա նշեց, որ մարդիկ կան, որոնք թերահավատորեն են մոտենում քարոզարշավի ծախսերը դրամահավաքի միջոցով հոգալու մոտեցմանը:
«Ժողովուրդ ջան, ձեր ամեն մի տված դրամը համեմատում եմ աստվածաշնչյան 5 հացի եւ 3 ձկան բազմապատկման գործընթացի հետ: Մինչեւ հիմա էդ գործընթացն իր արդյունքները տալիս է: Թերահավատներին կարող եմ ասել, որ այս մոտեցումը ոչ միայ իր նպատակներին է ծառայում, այլեւ շատ առաջադեմ ու նորարական է»:
Հիշեցնենք, որ Երեւանի ավագանու ընտրությունները տեղի կունենան մայիսի 14-ին: «Ելք» դաշինքի ցուցակը գլխավորում է Նիկոլ Փաշինյանը:
