Ամբողջ Մերձավոր Արեւելքում իրավիճակը մեծամասամբ կախված է պաղեստինա- իսրայելական հակամարտության շուրջ իրադարձությունների զարգացումից։ Այս մասին հայտնել է ՄԱԿ-ի մերձավորարեւելյան խաղաղ գործընթացի հարցերով հատուկ համակարգող Նիկոլայ Մլադենովը ՄԱԿ ԱԽ նիստի ժամանակ։
«Արաբա- իսրայելական համակարտությունն առաջվա պես ազդում է ամբողջ տարածաշրջանի իրադրության վրա։ Պաղեստինյան հարցը մնում է հզոր խորհրդանիշ ու միավորող կարգախոս, որից իրենց նպատակների համար հմտորեն օգտվում են ծայրահեղականների խմբերը։ Օկուպացիայի դադարեցումն ու երկու պետությունների մասին որոշման իրականացումը չի լուծի տարածաշրջանի բոլոր խնդիրները, սակայն քանի դեռ հակամարտությունը շարունակվում է, այն շարունակելու է սնել նաեւ այդ խնդիրները»,- համարում է Մլադենովը։
Նրա խոսքով, իրավիճակը խորանում է իսրայելական բնակավայրերի ընդլայնման պատճառով։ Այդ կապակցությամբ նա հիշեցրել է, որ Իսրայելում մարտին հաստատվել է նոր բնակավայր կառուցելու որոշումը։
Նա հայտնել է , որ իսրայելեկան բնակավայրերի ընդլայնումը միջազգային իրավունքի խախտում է ու պետք է դադարեցվի։ Մլադենովը Խորհրդի անդամներին զեկուցել է նաեւ պաղեստինցիների միջեւ լարվածության աճի, Գազայի ու Արեւմտյան ափի միջեւ դիմակայության էսկալացիայի հնարավորության եւ ԳԱզայի հումանիտար ծանր իրավիճակի մասին։