ՀԱՊԿ գլխավոր քարտուղարի պաշտոնում Հայաստանի քաղաքացու նշանակումն ինչպես դրական, այնպես էլ բացասական կողմեր ունի: Ապրիլի 21-ին կայացած ասուլիսում այս մասին հայտարարեց ՀՀ պաշտպանության նախարար Վիգեն Սարգսյանը՝ մեկնաբանելով ՀԱՊԿ գլխավոր քարտուղարի պաշտոնում Յուրի Խաչատուրովի նշանակման եւ ընդհանրապես կազմակերպության արդյունավետության մասին հարցին:
Նա հիշեցրեց, որ միշտ ասել է այն մասին, որ կառույցը Հայաստանի անվտանգության կարեւոր բաղկացուցիչներից է: Բայց այն մի շարք խնդիրներ ունի, որոնց թվում նախարարը նշեց մեղմ ուժի բացակայությունն ու երրորդ կազմակերպություններում դիրքորոշումների անհամապատասխանության հարցը:
Սարգսյանը, միաժամանակ, նշեց, որ դա միայն ՀԱՊԿ-ի խնդիրը չէ, նման խնդիրներ ունի նաեւ ՆԱՏՕ-ն, որի անդամ պետությունների դիրքորոշումները ոչ միայն չեն համընկնում, այլեւ հակասում են միմյանց, օրինակ՝ Թուրքիայի եւ Հունաստանի պարագայում:
«Ամեն դեպքում, մենք միշտ բարձր ենք գնահատել Ղարաբաղի հարցով ե՛ւ ՀԱՊԿ-ի, ե՛ւ գլխավոր քարտուղար Նիկոլայ Բորդյուժայի հայտարարությունները, հատկապես՝ իրադրության սրման ժամանակ»,- նշեց Վիգեն Սարգսյանը:
Ինչ վերաբերում է Յուրի Խաչատուրովի նշանակմանը, ըստ նախարարի՝ ՀԱՊԿ գլխավոր քարտուղարի պաշտոնում Հայաստանի քաղաքացու նշանակումը կարող է ինչպես դրական, այնպես էլ բացասական կողմեր ունենալ: «Մի բան է, երբ հայտարարություն է անում ՌԴ քաղաքացին, այլ բան, երբ պոտենցիալ հայտարարությունը Հայաստանի քաղաքացունն է: Չնայած օբյեկտիվորեն նա գլխավոր քարտուղարի պաշտոնը ստանձնում է որպես միջազգային պաշտոնյա, այլ ոչ Հայաստանի քաղաքացի»,- նշեց նախարարը՝ հավելելով, որ հայտարարությունները որոշակիորեն համաձայնեցվում են:
Նախարարն ընդգծեց, որ ՀԱՊԿ-ն կարող է բազմաթիվ հարցեր լուծել, եւ Հայաստանը կխորացնի հարաբերությունները կազմակերպության հետ: «Որպեսզի մեր անդամակցությունն առավելագույնս օգտակար եւ արդյունավետ լինի»,- հայտարարեց Վիգեն Սարգսյանը: