Եթե Թուրքիան չճանաչի հայոց Ցեղասպանությունը, ապա մարդկության համար այդ չարիքը կշարունակվի ամբողջ աշխարհում: Այս մասին լրագրողների հետ հանդիպման ժամանակ ապրիլի 22-ին հայտարարել է «Հայաստանի Եզդիների ազգային միություն» հասարակական կազմակերպության նախագահ Ազիզ Թամոյանը:
Նրա խոսքով` առաջադեմ մարդկությունը դատապարտում ու ընդունում է ցեղասպանությունը: «Միջազգային կազմակերպությունները պետք է զբաղվեն այդ խնդրով: Թուրքիան պետք է ճանաչի հայ ժողովրդի նկատմամբ Ցեղասպանություն գործելու փաստը: Եթե Թուրքիան դա չանի, մարդկության համար այդ չարիքը կշարունակվի: Մենք պետք է ամբողջ աշխարհին ցույց տանք, որ ցեղասպանություն է տեղի ունեցել: Մենք մշտապես պետք է մեր ձայնը բարձրացնենք, որպեսզի նման երեւույթներ այլեւս չլինեն»,-ընդգծել է Ազիզ Թամոյանը:
Հանդիպման մեկ այլ մասնակից` Հայաստանի եզդիների հոգեւոր առաջնորդ Բրո Հասանյանը, իր հերթին, նկատել է. «Եթե իրենց ռաջադիմական համարող երկրները չեն ճանաչում հայոց Ցեղասպանությունը, նրանք իրավունք չունեն իրենց զարգացած պետություններ համարել: Պատմական բոլոր փաստերով ապացուցված է, որ Թուրքիան Արեւմտյան Հայաստանում ցեղասպանություն է իրականացրել: Իսրայելը եւս հոլոքոստ է տեսել, բայց հայոց Ցեղասպանությունը չի ճանաչում: Քանի դեռ Հայոց ցեղասպանությունը չի ճանաչվել ու չի դատապարտվել, աշխարհում դեռ կկրկնվեն բազմաթիվ ցեղասպանություններ»:
