Հայաստանի ազգային արխիվի տնօրեն Ամատունի Վիրաբյանն ու իր թիմի անդամները մտադիր են առաջիկայում ավարտել Հայոց ցեղասպանությանը վերաբերող փաստաթղթերի երեք հատորների հրապարակումը:
Այսօր՝ ապրիլի 22-ին, հրավիրված մամուլի ասուլիսի ժամանակ Վիրաբյանը նշեց նաեւ, որ շարունակում են Ցեղասպանության զոհերի շտեմարանի ստեղծման աշխատանքները:
«Տասնյակ հազարավոր մարդկանց անուններ ունենք, աշխատանքները շարունակվում են, դրանք տարիների երկարաժամկետ աշխատանք է եւ չեմ կարող ասել, թե մի օր այն կավարտենք, քանի որ նոր անուններ, փաստեր են ի հայտ գալիս: Դա էլեկտրոնային տարբերակով է եւ եթե որոշակի քանակի հասնեն՝ երեք հարյուր հազարի, ապա կտեղադրենք»,-ասաց նա:
Նշենք, որ մայիսյան հերոսամարտերի 100-ամյակին ընդառաջ Հայաստանի ազգային արխիվը նախատեսում է լուսանկարների քարտեզներ, տեսանյութերի, փաստաթղթերի ցուցահանդես, որը փորձելու են տարբեր երկրներում ներկայացնել։
«Հայոց ցեղասպանության ճանաչումը, հատուցումը մեկ-երկու տարվա խնդիր չէ, տասնամյակների խնդիր է»,- ասաց Ամատունի Վիրաբյանը՝ նշելով, որ բոլոր նյութերը թարգմանվելու են տարբեր լեզուներով համաշխարհային հանրության համար: