Երեւանի Ազատության հրապարակից այսօր՝ ապրիլի 23-ին, երեկոյան մեկնարկած ամենամյա ավանդական ջահերով երթին միացել է նաեւ Երեւանի քաղաքապետի ընտրություններին մասնակցող «Երկիր ծիրանի» կուսակցությունը՝ Զարուհի Փոստանջյանի գլխավորությամբ։
Ջահերով երթին կուսակցության ներկայացուցիչները մասնակցում են «Երկիր ծիրանի» գրությամբ շապիկներով:
NEWS.am-ի հարցին՝ արդյոք կուսակցությունը երթի ընթացքում նաեւ քարոզարշավ է իրականացնում, Զարուհի Փոստանջյանը պատասխանեց, որ ջահերով երթը քաղաքական բնույթի միջոցառում է եւ իրենք եւս այս երթին մասնակցում են՝ որպես քաղաքական ուժ:
«Մենք այսօր քարոզարշավ իրականացրել ենք, նաեւ հանդիպումներ ենք ունեցել հասարակության ներկայացուցիչների հետ: Մեր ծրագրային դրույթները ներառում է նաեւ գործընկերային հարաբերություններ տարբեր մասնագիտություններ ունեցող մարդկանց հետ եւ այսօր հենց այսպիսի հանդիպումներ ենք ունեցել»,- ասաց նա:
Նշենք, որ ջահերով երթին մասնակցում են նաեւ ՀՀԿ-ի եւ ՀՅԴ-ի ներկայացուցիչներ: