Ժամանակն է, որ Հայաստանի Հանրապետությունը հանի իր ստորագրությունը հայ-թուրքական արձանագրությունների տակից: Այս մասին, այսօր՝ ապրիլի 24-ին, Ծիծեռնակաբերդում լրագրողների հետ զրույցում նշել է ԱԺ պատգամավոր, «Երկիր ծիրանի» կուսակցության ղեկավար Զարուհի Փոստանջյանը՝ հավելելով, որ թեեւ այդ արձանագրություններն ԱԺ-ում չեն, սակայն ստորագրությունը շարունակում է մնալ եւ բացի այդ մենք պետք է իրավունքի ուժով ճանաչենք մեր պահանջատիրությունը:
Նա նշեց, որ դրա վերաբերյալ ներկայացրել է 3 օրինագիծ. «Առաջինը վերաբերում է Թուրքիայի կողմից մեր հայրենիքի, հայրենի բնօրրանի տարածքների բռնազավթման դատապարտմանը: Երկրորդը վերաբերում է քեմալա-բոլշեւիկյան գործարքին, որով մեր հայրենի տարածքները ուղղակի նվիրաբերվել են Թուրքիային, եւ դա այդ գործարքի ապօրինությանն է վերաբերվում: Երրորդը վերաբերվում է բնիկ ժողովուրդների իրավունքներին: Մենք հայերս բնիկ ժողովուրդն ենք այդ տարածքի, տարածքը մեզ է պատկանում, տարածքը դա երկիր ծիրանին է, հայկական բարձրավանդակը իր հարակից տարածքներով»:
Փոստանջյանի խոսքով, այսօր մենք այլեւս չպետք է սգանք, ընդհակառակը, պետք է մեր պահանջները ներկայացնենք եւ մեր իրավունքները ճանաչենք. «Մենք վերածնվել ենք այն ամենից հետո, ինչ տեղի ունեցավ 102 տարի առաջ մեր ազգի հետ, իմ պապերի, իմ տատերի հետ: Նրանք փրկվեցին եւ այսօր տվեցին ծնունդ: Եվ մենք ծնունդը շարունակելու ենք, մենք վերածնունդը շարունակելու ենք, բայց սգալ ու պետություններից պահանջել Ցեղասպանության ճանաչում դա արդյունավետ չէ: Մենք պետք է պահանջենք ճանաչել մեր իրավունքները եւ հատուցում տալ պատճառված վնասների համար: Դրանք եւ նյութական են, եւ բարոյական են, եւ տարածքային են: Սա պետք է լինի մեր պետական քաղաքականության եւ արտաքին դիվանագիտության բաղկացուցիչ մասը: Մենք այլեւս չպետք է լռենք, չնայած այս 25 տարիների ընթացքում միայն լռել ենք եւ սգացել»: