Ապրիլի 2-ի խորհրդարանական ընտրությունները ժողովրդի կամքի զանգվածային խեղաթյուրում էին: Այս մասին հայտարարեց ՀԱԿ խմբակցության ղեկավար Լեւոն Զուրաբյանը՝ Սահմանադրական դատարանում ապրիլի 2-ին կայացած ընտրությունների արդյունքներն անվավեր ճանաչելու մասին Կոնգրես-ՀԺԿ դաշինքի հայցի քննության ժամանակ:
«Ինձ մոտ դեժավյուի տպավորություն է, քանի որ նախկինում արդեն ՀԱԿ-ի հայցը ներկայացրել եմ՝ ընտրությունների արդյունքներն անվավեր ճանաչելու մասին: Ամեն անգամ ընտրությունները կեղծվում են, դրանք բողոքարկվում են, իսկ ՍԴ-ն գտնում է, որ խախտումներ չեն եղել»,- հայտարարեց Զուրաբյանը:
Այստեղ ՍԴ նախագահ Գագիկ Հարությունյանն ընդհատեց Զուրաբյանին՝ նկատելով, որ օրենքն արգելում է քաղաքական բնույթի հայտարարությունները. «Փորձեք հիմնավորել ՍԴ դիմելու պատճառները, այլ հանդես չգալ քաղաքական հայտարարություններով»:
Ի պատասխան՝ Զուրաբյանը պնդեց, որ իր խոսքերն ուղղակիորեն վերաբերում են ստեղծված իրավիճակին, եւ խնդիրն ավելի լայն է, քան ապրիլի 2-ի ընտրությունները: Այդպես է եղել բոլոր նախորդ խորհրդարանական եւ նախագահական ընտրություններից հետո, շարունակեց Զուրաբյանը: Նա նշեց, որ ժողովրդական բողոքն արտահայտվում է բազմահազարանով ցույցերով եւ հիշեցրեց 2008 թվականի մարտի 1-ի իրադարձությունները. «Ժողովրդի մեջ խորը անվստահություն է ձեւավորվել»,- արձանագրեց Զուրաբյանը:
Ընդհանուր առմամբ՝ ապրիլի 2-ի ընտրությունները նա համարեց զանգվածային կեղծարարություն, որի մեղավորն իշխող Հանրապետական կուսակցությունն է: Ընդ որում՝ գործի են դրվել վարչական լծակները, օլիգարխները, բանակն ու քրեական տարրերը՝ ընտրողների վրա ճնշում գործադրելու համար: Նրա խոսքով՝ ընտրակաշառքը միջինը կազմել է 10 հազար դրամ, եւ զանգվածային խախտումները ՀՀԿ-ին թույլ են տվել վերահսկել քվեարկության գործընթացը:
Նրա խոսքով՝ տեղամասերում դրված տեսախցիկները «հանկարծ» դադարել են աշխատել, ի հայտ են եկել ինտերնետի հետ կապված խնդիրներ:
Պարզվել է, որ առանց տեսախցիկների տեղամասերում ՀՀԿ-ն ավելի քիչ ձայներ է ստացել, քան տեսախցիկներով տեղամասերում: Տարբերությունը կազմել է 9%:
Զուրաբյանը նաեւ նշեց դպրոցների տնօրենների, ինչպես նաեւ «ՍԱՍ» սուպերմարկետի հետ կապված սկանդալային միջադեպերի մասին: Նրա խոսքով՝ առաջին դեպքում իրավապահ մարմինները չեն արձագանքել, իսկ երկրորդի մասով պետք է լինի ԿԸՀ արձագանքը, քանի որ ձայնագրությունը ցույց է տալիս, որ սուպերմարկետի տիրոջ օգտին տրված ձայները ճնշման արդյունքում են եղել:
Զուրաբյանը նաեւ միջնորդություն ներկայացրեց հատուկ հանձնաժողով ստեղծելու մասին, որը պետք է ուսումնասիրի խախտումների մասին ներկայացված 1500 տեսանյութերը: «Ավելի լավ ապացույց չեք գտնի: Եվ այս ամենը տեղի է ունեցել մեր աչքի առջեւ»,- նշեց Լեւոն Զուրաբյանը:
Նրա տարակուսանքն է հարուցում այն, որ չնայած բնակչության արտագաղթի մասին պաշտոնական տվյալներին՝ ընտրողների թիվն ավելացել է: