Կոռուպցիոն սկանդալը Եվրոպայի խորհրդի խորհրդարանական վեհաժողովի գարնանային նստաշրջանի ընթացքում համար մեկ հարցն է։
Գարնանային նստաշրջանի երկրորդ օրը ելույթ է ունեցել Եվրոպայի խորհրդի Գլխավոր քարտուղար Թյորբերն Յագլանդը։ Ելույթից հետո նա սկսել է պատասխանել պատվիրակների հարցերին։
Առաջին երեք հարցերն ունեին գրեթե նույն բովանդակությունը՝ կոնկրետ ի՞նչ է արել Եվրոպայի խորհուրդը եւ Գլխավոր քարտուղարը՝ մասնավորապես, որպեսզի ԵԽԽՎ-ում վերջ դրվի կոռուպցիային։
Առաջին հերթին ,Յագլանդն ընդգծել է, որ չի կարող ոչ մի հանդուրժողականություն լինել Եվրոպայի խորհրդում կոռուպցիայի որեւէ ձեւի նկատմամբ։ Սակայն նա մի քանի անգամ ընդգծել է, որ ԵԽԽՎ-ն ինքը պետք է որոշում ընդունի մեխանիզմների ու ընթացակարգերի վերաբերյալ։
Նույն պատասխանն է նա տվել նաեւ ԵԽԽՎ նախագահ Անդրե Ագրամունտի ենթադրյալ իմփիչմենթի մասին։ Նրա խոսքով՝ հենց ԵԽԽՎ պատվիրակները պետք է որոշումներ ընդունեն ընթացակարգային հարցերի շուրջ։