Այս տարվա փետրվարին Սուրեն Տ.-ն իր ընկերների հետ միս գնելու նպատակով փորձել էր հուշանվերային թղթադրամներ իրացնել, բայց մինչ ապրանքը մեքենա կտեղափոխեին, ոստիկանները հասել են դեպքի վայր ու նրանց խարդախության փորձ կատարելու մեղադրանքով տեղափոխել ոստիկանության բաժանմունք:
Ոստիկանությունից NEWS.am-ին հայտնում են, որ նախկինում տարբեր հանցագործությունների համար 8 անգամ դատապարտված Սուրեն Վարդանյանի մոտից հայտնաբերվեց 4 հատ 5000, 12 հատ 1000 ռուբլու, 14 հատ 50 դոլարի նմանվող հուշանվերային թղթադրամ եւ դանակ:
Սուրեն Տ.-ն ու ընկերները ստորագրությամբ բաց էին թողնվել, սակայն չեն դադարել մոլորեցնել մարդկանց: Նույն եղանակով ոչխարներ էին հափշտակել Արարատի, Արագածոտնի մարզերում ու բռնվել էին:
Ուջան գյուղի բնակիչներից մեկից 3 գառ էին գնել, ոչխարների տիրոջը վճարելով հուշանվեր թղթադրամներով: Բնակիչը հաղորդում էր տվել ոստիկանություն:
«Տաքսով եկան, 3 հատ գառ առան ինձնից, հուշանվերներ փող տվին ու ելան գնացին: Ընձի խաբեցին, 73 տարեկան մարդ եմ, ես էլ չիմացա, որ տենց հուշանվեր փող կա, թե չկա: Որ առան գնացին, էդ փողը տվի կնոջս, ինքը ասեց, որ էսի խարդախ փող է»,-ոստիկանության բաժնում ասաց գյուղացին:
Նրանց հետ տարված բացատրական աշխատանքներից հետո Սուրեն Տ.-ն, Արմեն Ա.-ն եւ Գեղամ Մ.-ն ապրիլի 19-ին ներկայացան ոստիկանության բաժանմունք եւ տվեցին ինքնախոստովանական բացատրություն:
Փաստի առթիվ հարուցվել է քրեական գործ, քննությունը շարունակվում է: