Պեդրո Ագրամունտը ընտրեց մինչեւ վերջ իրեն խայտառակելու տարբերակը՝ այսօր առավոտյան չներկայանալով ԵԽԽՎ բյուրոյի նիստին եւ չներկայացնելով իր հրաժարականը, ինչպես խոստացել էր: Այս մասին, այսօր՝ ապրիլի 28-ին, Facebook-ի իր էջում գրել է ԵԽԽՎ-ում հայստանյան պատվիրակության անդամ Սամվել Ֆարմանյանը:
Նրա խոսքով, ստեղծված իրավիճակում, ԵԽԽՎ Բյուրոն ստիպված էր կայացնել նրան դե ֆակտո իմփիչմենթի ենթարկելու ստորացուցիչ եւ աննախադեպ որոշում: Ֆարմանյանը հրապարակել է բյուրոյի որոշումն ու հավելել.
«Հ.Գ .1. Ի դեպ, Բյուրոյում այդ որոշմանը կողմ են արտահայտվել բոլոր պատգամավորները՝ քսանյոթ, իսկ ձեռնպահ են քվեարկել երեք պատգամավոր՝ Իսպանիայից եւ ....... Ադրբեջանից.....
Հ.Գ. 2. Որպես ստեղծված ամոթալի իրավիճակի իրավական հանգուցալուծում՝ հունիսյան նստաշրջանի առաջին իսկ օրը փոփոխության կենթարկվի ԵԽԽՎ կանոնակարգը եւ կնախատեսվի հատուկ դրույթ՝ Պեդրո Ագրամունտին արդեն դե յուրե հեռացնելու ԵԽԽՎ նախագահի պաշտոնից, եթե, իհարկե, մինչ այդ նա շարունակի հայտնի կենդանու համառությամբ չներկայացնել իր հրաժարականը: Մինչ այդ, մայիսին Պրահայում տեղի կունենա ԵԽԽՎ ԵԺԿ խմբակցության արտահերթ նիստ՝ քննարկելու այս խայտառակագույն ու աննախադեպ իրավիճակը: Իսկ ԵԺԿ-ն հատուկ նիստ կհրավիրի Բրյուսելում՝ քննարկելու Պեդրո Ագրամունտի ամոթալի վարքագիծը»:
Ավելի վաղ NEWS.am-ը հայտնել էր, որ ԵԽԽՎ բյուրոն անվստահություն է հայտնել Պեդրո Ագրամունտին, որպես ԵԽԽՎ նախագահի: Բացի այդ, Բյուրոն որոշում է կայացրել, որ Ագրամունտը լիազորված չէ որեւէ պաշտոնական այց կատարել, ներկա լինել որեւէ խորհրդակցության կամ հրապարակային հայտարարություններ անել ԵԽԽՎ-ի անունից, որպես կառույցի ղեկավար:
ԵԽԽՎ ավագ փոխնախագահ Ռոջեր Գալեն հայտարարել է, որ Ագրամունտը որոշել է չմասնակցել Բյուրոյի այսօր կայացած նիստին եւ հրաժարականի դիմում չի ներկայացրել. «Վեհաժողովի չափանիշներն ու սկզբունքները կարեւոր են ցանկացած առանձին անդամից, իսկ մեր Վեհաժողովի ամբողջականությունը պետք է պահպանվի»,-հավելել է նա: