Բացառված չէ Հայաստանի իշխանությունների մասնակցությունը «Ծառուկյան» դաշինքի պատգամավորների գործողություններին, որոնք հրաժարվել են ինքնաբացարկի հայտարարություններից։ Այս մասին մայիսի 4-ին լրագրողների հետ հանդիպման ժամանակ ասել է քաղտեխնոլոգ Վիգեն Հակոբյանը։ Նրա խոսքով՝ դրանում շահագրգռված կողմեր են եղել։
«Վերջիվերջո, ենթադրվում է, որ իշխանությունը պետք է շահագրգռված լինի խորհրդարանում իր համար «հարմարավետ» սեգմետնի ձեւավորման հարցում։ Այսինքն այն բանում, որ ունենա ինչ-որ մի ոչ ընդդիմադիր սեգմենտ, որտեղ կլինեն մի շարք ոչ իշխանական կուսակցություններ, որոնք կներկայացվեն խորհրդարան, սակայն ոչ նախկին խմբակցությունների ձեւաչափով։ Իսկ «Ծառուկյան դաշինքի դեպքը չափազանց էր», -նշել է Հակոբյանը։
Հիշեցնենք, որ «Ծառուկյան» դաշինքի թեկնածուներից 23-ը նախօրեին ինքնաբացարկի դիմումներ են ներկայացրել ԿԸՀ, սակայն արդեն այսօր նրանցից 11-ը հրաժարվել են իրենց դիմումներից եւ հայտարարել, որ ցանկանում են վերցնել իրենց մանդատները: Այդ թեկնածուներն են. Նապոլեոն Ազիզյան, Խաչիկ Մանուկյան, Մուշեղ Սաղաթելյան, Ալիկ Եղիկյան, Արարատ Զուրաբյան, Սերգեյ Բագրատյան, Հրանտ Դավթյան, Վահան Կարապետյան, Մանուկ Սուքիասյան, Արթուր Մանուկյան, Արտյոմ Ծառուկյան:
