Հանրապետական կուսակցությունում տիրող իրավիճակը համեմատել ԲՀԿ–ում տիրող իրավիճակի հետ, անհեթեթություն է, ՀՀԿ–ն լուրջ կուսակցություն է։ Այս մասին NEWS.am-ի հետ զրույցում հայտարարել է ՀՀկ խոսնակ Էդուարդ Շարմազանովն՝ անդրադառնալով այն մեկնաբանություններին, որ ՀՀԿ–ում էլ տիրում է այն իրավիճակը, ինչ ԲՀԿ–ում, որտեղ թեկնածուների կամքին հակառակ ինքնաբացարկի դիմումներ են ներկայացնում Կենտրոնական ընտրական հանձնաժողով։
«Հանրապետականում որոշումները ընդունվում են քննարկումների արդյունքում, յուրաքանչյուրը առաջնորդվում է ընդունված որոշմամբ։ Ովքեր որ ինքնաբացարկի դիմումներ են գրել, գրել են կուսակցությունում տեղի ունեցած քննարկումների արդյունքում: Այդ թեկնածուներն իրենց ծառայությունները իրականացնելու են այլ պետական կառույցներում, այդ առումով ՀՀԿ–ն համեմատել ԲՀԿ–ում տիրող իրավիճակի հետ, անհեթեթություն է։ ՀՀԿ–ն լուրջ քաղաքական կուսակցություն է»,–ասել է Շարմազանովը։
Անդրադառնալով այն մեկնաբանություններին, որ «Ծառուկյան» դաշինքի 12 թեկնածուները հրաժարվելով ԿԸՀ ներկայացված ինքնաբացարկի դիմումներից եւ Ծառուկյանի կամքին դեմ գնալով ստանալով մանդատները, ուղղորդվել են ՀՀԿ վերնախավի կողմից եւ ԱԺ-ում համագործակցելու են ՀՀԿ–ի հետ, Շարմազանովն ասել է. «Ես պաշտոնապես հայտարարում եմ, որ ՀՀԿ–ն այլ քաղաքական ուժերի, «Ծառուկյան» դաշինքի ռազբորկաների ցուցակից վեր է։ Մանդատներից հրաժարվելու գործընթացներին չի մասնակցել, մենք զբաղված ենք մեր գործունեությամբ»։
Հարցին՝ բացառո՞ւմ է, որ ԱԺ–ում այդ պատգամավորները համագործակցելու են ՀՀԿ–ի հետ եւ քվեարկելու են՝ ինչպես ՀՀԿ–ականները, նա պատասխանել է. «Դա պատգամավորների իրավունքն է, ով է համագործակցելու, ով՝ չէ, բայց որ ՀՀԿ–ն այստեղ դերակատարում չի ունեցել, դա փաստ է»։