Հայաստանում Ռուսաստանի դեսպան Իվան Վոլինկինը բարձր կարծիքի է նորանշանակ ՀԱՊԿ (Հավաքական անվտանգության պայմանագրի կազմակերպութուն) գլխավոր քարտուղար Յուրի Խաչատուրովի ունակությունների մասին։
«Յուրի Գրիգորեւիչ Խաչատուրովին ես ճանաչում եմ մի քանի տարի։ Արժանավոր մարդ է։ Ես կարծում եմ, որ որպես ՀԱՊԿ գլխավոր քարտուղար, նա կցուցաբերի իր բոլոր ունակությունները, որոնք, անկասկած, բնորոշ են նրան, եւ նա դրանք ի ցույց է դրել՝ գտնվելով Հայաստանի գլխավոր շտաբի պետի պաշտոնում։ Ես կարծում եմ, որ Յուրի Գրիգորեւիչ Խաչատուրովը շատ բան կարող է անել կազմակերպության համար։ Առհասարակ, Հայաստանը կազմակերպության շատ ակտիվ անդամ է, մշտապես նոր նախաձեռնություններով է հանդես գալիս, որոնց աջակցում են կազմակերպության բոլոր անդամները։ Յուրի Գրիգորեւիչը լոկոմոտիվ կլինի», - լրագրողների հետ զրույցի ժամանակ ասել է դեսպանը։
