Հայաստանը լավ պլացդարմ է արտաքին շուկաներ ելքի համար: «Yerevan Show» ոսկերչական ցուցահանդեսի ժամանակ NEWS.am-ի թղթակցի հետ զրույցում այս մասին հայտարարեց «Ոսկե նախշեր» ռուսական ոսկերչական ընկերության արտաքին տնտեսական գործունեության բաժնի ղեկավար Արտյոմ Վլադիսովը:
Ընկերությունը երկրորդ անգամ է մասնակցում ցուցահանդեսին եւ հասցրել է դրական գնահատել բիզնեսի տեղական կանոնները:
«Հայաստանի գլխավոր առավելությունը հարմար լոգիստիկան ու մաքսային օրենսդրությունն են: Հատկապես մեզ համար, քանի որ մենք Հայաստանի հետ միասնական մաքսային միության մեջ ենք: Ժամանակակից առեւտրի պայմաններում նման պարզեցված ռեժիմը գրավում է»,- հայտարարեց Վլադիսովը:
Նախորդ՝ 2016 թվականի հոկտեմբերին տեղի ունեցած ցուցահանդեսի ժամանակ ռուսական ընկերության գործերով հետաքրքրվել են գնորդներ Իրանից եւ Արաբական Միացյալ Էմիրություններից: Ցուցահանդեսից բացի՝ նաեւ Միջազգային ոսկերչական համադաշնության (CIBJO) է անցկացվել, որի ընթացքում կապեր են հաստատել նաեւ Ավստրալիայից գործարարների հետ:
Հայկական հետք կա նաեւ հենց ռուսական ձեռնարկությունում. այստեղ հայ աշխատակիցներ կան:
«Մեր վարպետների հմտությունների միավորմամբ էլ ռուսական պատրաստի արտադրանք ենք ստանում: Ամեն ինչ ինքներս ենք ստեղծում՝ էսքիզներից մինչեւ պատրաստի արտադրանք»,- նշեց Վլադիսովը: