Առաջիկայում Հայաստանում կսկսվի օրգանական մթերքի քարոզարշավը: Այս մասին NEWS.am-ին հայտնեց գյուղատնտեսության փոխնախարար Արմեն Հարությունյանը:
Դրա հետ մեկտեղ կշարունակվի գյուղացիների, նաեւ organic արտադրել ցանկացող ե՛ւ փոքր, ե՛ւ միջին բիզնեսի աջակցությունը: Ծրագրին 3,3 մլ եվրո չափով աջակցում են Եվրամիությունը եւ Ավստրիական զարգացման գործակալությունը:
Փոքր ձեռնարկություններին 1-ին փուլում օգնում են դաշտը, այգին կամ արտադրությունը պատրաստել օրգանիկայի համար: Որպեսզի պատրաստի արտադրանքը հնարվորինս շուտ հայտնվի սեղանին (եթե ոչ Եվրոպայում ապա գոնե առայժմ Հայաստանում), նախարարությունն արդեն համաձայնության է եկել խոշոր սուպերմարկետների հետ օրգանիկայի բաժին բացելու շուրջ: Սակայն առայժմ շատ տարատեսակներ չեն լինի՝ անհրաժեշտ է մի փոքր սպասել:
Օրգանիկայի համար նախապատրաստելուց հետո անհրաժեշտ է մինչեւ 3 տարվա անցումային շրջան: Սակայն կան այնպիսիները, որոնք հավաստագիր են ստացել դեռեւս մինչեւ այս ծրագիրը: Այժմ Հայաստանում հավաստագրեր ունեն ավելի քան 40 արտադրողներ, եւս նույնքանն էլ պատրաստվում են ստանալ: «Հույս ունեմ, որ 2018 թվականին մենք նաեւ բյուջեի սեփական միջոցներ կունենանք: Ցանկանում ենք սուբսիդիա հատկացնել նրանց, ովքեր օրգանիկայի հավաստագիր ստանալու հայց են ներկայացնում, ցանկանում են օրգանական պարարտանյութեր կամ տնկիներ գնել: Շատ կարեւոր է, որ մենք նկատի ունենանք ոչ միայն արտասահմանյան, այլ նաեւ մեր՝ հայկական շուկան: Իսկ դրա համար անհրաժեշտ է, որ մեր սպառողները ավելի լավ տեղյակ լինեն օրգանիկայի օգուտի մասին: Չէ՞ որ որքան մեր սնունդն առողջ է, այնքան առողջ են մեր երեխաները»,- նշեց Հարությունյանը:
Հիմա Գյուղատնտեսության նախարարությունը կանաչ տնտեսության ավելի ընդարձակ ծրագիր է մշակում, որտեղ օրգանիկային կավելանան ագրոտուրիզմը եւ եւ «մաքուր» էներգետիկան:
Նշենք, որ օրգանական են համարվում այն մթերքները, որոնք աճեցվել են առանց քիմիկատների (պարարտանյութերի եւ սրսկումների), ինչպես նաեւ առանց հողի մեջ դրանց մնացորդների: Իսկ եթե խոսքը վերաբերում է մշակված օրգանական մթերքներին (մուրաբաներ, հյութեր եւ այլն), ապա օրգանական պետք է լինեն ոչ միայն հիմնական բաղադրամասերը, այլեւ մնացյալը (օրիակ՝ շաքարը):
Տեղական շուկայում պահանջարկը դեռեւս շատ քիչ է, իսկ աճեցման ռիսկերը մեծ են (քիմիկատներ չօգտագործելու դեպքում նվազում է վնասատուների նկատմամբ կայունությունը): Այս պատճառով Հայաստանում օրգանիկա շատ քիչ են արտադրում:
Այն արտադրելուն խանգարում է նաեւ Արարատյան դաշտավայրում ազոտային պարարտանյութերի մնացորդային պարունակությունը: Հայկական ԽՍՀ-ի հողատարածքների քիչ լինելու պատճառով հողը չափից շատ են պարարտացրել բերքատվության բարձրացման համար: Նիտրատները հանելու միջոցները քննարկվել են դեռեւս խորհրդային տարիներին, սակայն Միության փլուզումից հետո չկարողացան մելիորացիայի համար փող գտնել:
