Բրիտանական ոստիկանությունը դադարեցրել է Մանչեսթերի պայթյունի հետաքննության ընթացքի վերաբերյալ տվյալներ փոխանցել ԱՄՆ իրավապահ մարմիններին, հաղորդում է BBC-ի ռուսական ծառայությունը:

Տեղեկությունների փոխանցման մերժումը կապված է արտահոսքի հետ, որոնց աղբյուրը ամերիկյան իրավապահ մարմիններն են:

Չորեքշաբթի New York Times-ում լուսանկարներ էին հրապարակվել: Պարբերականին հաջողվել էր լուսանկարներ ձեռք բերել, որոնք, իբր, բրիտանացի քննիչներն արել են ողբերգության վայրում: Դրանցում պատկերված են ուսապարկի կտորներ, ինչպես նաեւ սարք, որը «հնարավոր դետոնատոր» է համարվում:

Բացի այդ՝ ենթադրյալ մահապարտ-ահաբեկիչ Սալման Աբեդիի անունն ամերիկյան մամուլում հայտնվել է ողբերգությունից ընդամենը 24 ժամ անց:

Լուսանկարների հրապարակումը զայրացրել է Մեծ Բրիտանիայի կառավարությանը եւ ոստիկանությանը: Ոստիկանությունում կարծում են, որ հրապարակումները կարող են վնաս հասցնել հետաքննությանը:

Բրիտանիայի ՆԳ նախարար Էմբեր Ռադդը նշել է, որ «զայրացած» է տեղեկությունների հրապարակման պատճառով եւ Վաշինգտոնին զգուշացրել է, որ «դա չպետք է կրկնվի»:

Ակնկալվում է, որ Մեծ Բրիտանիայի վարչապետը հարցը կբարձրացնի ՆԱՏՕ-ի գագաթնաժողովում ԱՄՆ նախագահի հետ հանդիպման ժամանակ, որը կմեկնարկի հինգշաբթի Բրյուսելում: